Լրահոս

Հունիսի Արտաքին գործերի խորհրդում ԵՄ 27 երկրների արտաքին գործերի նախարարները կքննարկեն այն միջոցառումները, որոնք կարող են իրականացվել Վրաստանի առնչությամբ՝ պայմանավորված ռուսական օրենքի ընդունմամբ։

«Ակնհայտ է, որ առաջնահերթությունը Վրաստանին՝ ժողովրդավարական հասարակությանը պատժելը չէ, այլ ապահովել, որ ղեկավարությունը, որը կայացրել է որոշումներ, որոնք սպառնում են Վրաստանի ապագային, եվրոպական ապագային, իսկապես հասկանան այն ուղերձը, որ Վրաստանի ժողովուրդը ցանկանում է միանալ Եվրոպական միությանը, իսկ Վրաստանի կառավարությունը, խորհրդարանը դա դանդաղեցնում են»,- ասել է Բրաժեն։

Արտաքին հարաբերությունների խորհուրդը նախագահում է ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեֆ Բորելը։ Ինչպես նա է ասել նիստից առաջ, նախարարներին փաստաթուղթ է ներկայացվել, որտեղ թվարկված են այն տարբերակները, թե ինչ կարող է անել ԵՄ-ն Վրաստանի հետ կապված «կարճաժամկետ և միջնաժամկետ հեռանկարում»։ Բորելը նշել է, որ կարճաժամկետ հեռանկարում քննարկվում է Վրաստանին խաղաղության եվրոպական մեխանիզմի աջակցության դադարեցումը, բարձր մակարդակի քաղաքական շփումների դադարեցումը և ֆինանսական աջակցության այն մասի կասեցումը, որն ուղղակիորեն գնում է կառավարությանը։

Լիտվայի արտաքին գործերի նախարար Գաբրիելիուս Լանդսբերգիսը հայտարարել է, որ տարբերակների փաստաթղթում չի նշվում ԵՄ-ին Վրաստանի ինտեգրման դադարեցումը, ինչը, նրա կարծիքով՝ «պետք է նշել»։

Ֆինլանդիայի արտաքին գործերի նախարար Էլինա Վալտոնենը հայտարարել է, որ Ֆինլանդիան բաց է այն միջոցների համար, որոնք ուղղված են հատուկ վրացական կառավարությանը, այլ ոչ թե վրաց ժողովրդին: «Օրինակ, այն, ինչ մենք կարող ենք անել, վրացի պաշտոնյաների համար դժվարացնելն է Եվրոպա մուտք գործելը: Դա կարող է նշանակել պատժամիջոցներ, դա կարող է նշանակել նաև մի շարք միջոցներ, որոնք մենք կարող ենք ձեռնարկել»,- լրագրողներին ասել է Վալտոնենը։

Վրաստանի հետ կապված որոշում այսօր չի սպասվում։