Վրաստանում գործազրկության մակարդակը նվազել է մինչև 13.7 տոկոս

Ըստ Սաքստատի հաշվետվության՝ այս տարվա ապրիլ-հունիսին, նախորդ տարվա համապատասխան ժամանակահատվածի համեմատ, վարձու աշխատողների թիվն աճել է 19․1 հազարով (2․1%) և հասել 935․8 հազարի, իսկ ինքնազբաղվածների թիվը՝ 41․3 հազարով և (10․1%) կազմել 451․5 հազար։

«Նույն ժամանակահատվածում գործազուրկների թիվը նվազել է 47․2 հազարով (17․7%) և կազմել 219․7 հազար»,- կարդում ենք զեկույցում։

Երկրորդ եռամսյակում աշխատուժի մասնակցության մակարդակը (աշխատուժի տեսակարար կշիռը 15 տարեկան և բարձր տարիքի բնակչության մեջ) տարեկան կտրվածքով աճել է 1․3%-ով և կազմել 54․5%, մինչդեռ զբաղվածության մակարդակն աճել է 2․8%-ով և կազմել 47%:

Սաքստատը նշում է, որ զբաղվածության մակարդակն աճել է ինչպես քաղաքային, այնպես էլ գյուղական բնակավայրերում։ Մասնավորապես, քաղաքատիպ բնակավայրերում զբաղվածության մակարդակն աճել է 3%-ով, իսկ գյուղական բնակավայրերում՝ 2․5%-ով և կազմում է համապատասխանաբար 47․9 և 45․8 տոկոս։

Նախորդ տարվա համապատասխան ժամանակաշրջանի համեմատ վարձու աշխատողների տեսակարար կշիռը աշխատողների ընդհանուր թվաքանակում նվազել է 1.6%-ով և կազմել 67.5%:

Գործազրկության մակարդակն ավանդաբար ավելի բարձր է տղամարդկանց, քան կանանց շրջանում։ Ապրիլ-հունիսին նախորդ տարվա համապատասխան ժամանակահատվածի համեմատ կանանց շրջանում գործազրկության մակարդակը նվազել է 3.6%-ով, իսկ տղամարդկանց դեպքում՝ 2.6%-ով՝ համապատասխանաբար կազմելով 10.9 և 15.9 տոկոս։