Խնդիր չեմ տեսնում, որ գլխավոր պողոտան Ստալինի անունն է կրում. Խինչեգաշվիլի

«Իմ անձնական կարծիքն այն է, որ ես խնդիր չունեմ և որևէ խնդիր չեմ տեսնում, որ գլխավոր պողոտան կոչվի Ստալինի անունով»,- լրագրողներին ասել է Խինչեգաշվիլին, ով այսօր՝ նացիզմի դեմ տարած հաղթանակի 78-րդ տարեդարձի կապակցությամբ ծաղիկներ է խոնարհել Երկրորդ համաշխարհային պատերազմի մարտիկների հուշահամալիրին։

Միաժամանակ «ստալինիստները» ցույց են անցկացրել խորհրդային բռնապետի թանգարանի մոտ և կրկին պահանջել Իոսիֆ Ստալինի հուշարձանը վերադարձնել քաղաքի կենտրոն։ Խոսքը վեց մետրանոց բրոնզե արձանի մասին է, որը կանգնած է եղել Գորիում՝ 1952 թվականից մինչև 2010 թվականը։

«Այս հանճարեղ մարդն այսօր հաղթեց չարին, և մենք առաջին հերթին նշում ենք այս օրը։ Ինչ վերաբերում է հուշարձան կանգնեցնելուն, մենք այլևս ոչ թե պահանջում ենք, այլ վերջնական զգուշացնում ենք այս իշխանությանը, թե չէ 2024-ի ընտրություններում մեզանից ձայն չեն ստանա, որտեղ մենք՝ «ստալինիստներս», պետք է առյուծի բաժինը ներդնենք, ինչը կարող է վատ ավարտ ունենալ նրանց համար: 10 տարի որ իշխանություն են, մենք ամբողջ Վրաստանով վիթխարի ձայներ ենք բերել»,- ասել է հանրահավաքի մասնակիցներից մեկը։

Քաղաքացիների նախաձեռնող խումբը 2018 թվականին տեղական ինքնակառավարման մարմիններին դիմել էր Ստալինի անվան Գորիի կենտրոնական փողոցն անվանափոխելու պահանջով։

2011 թվականին ընդունված՝ «Ազատության խարտիա» օրենքը նախատեսում է կոմունիստական ​​տոտալիտար խորհրդանիշների, հուշարձանների, խորաքանդակների, մակագրությունների, փողոցների, հրապարակների, գյուղերի և ավանների անվանումների վերացում։ Նշված օրենքի հիման վրա Վրաստանի պետանվտանգության ծառայությունում ստեղծվել է հատուկ հանձնաժողով, որի հիմնական գործառույթներից է տեղեկություններ հավաքել այնպիսի փողոցների անվանումների մասին, որոնք «պարունակում են կոմունիստական ​​տոտալիտար և ֆաշիստական ​​գաղափարախոսությունների և քարոզչության տարրեր կամ այդ գաղափարախոսությունների առաջնորդների անուններ»։ Նման անունները վերացնելու համար Հանձնաժողովը պարտավոր է դիմել լիազորված անձին։ Հանձնաժողովի ցուցումների կատարումը պարտադիր է։