Խորհրդարանի իրավական հարցերի հանձնաժողովը երկրորդ ընթերցմամբ էլ հավանություն տվեց ռուսական օրենքին

Օխանաշվիլին ռուսական օրենքի քննարկումից հեռացրել է Գիորգի Վաշաձեին, Լևան Բեժաշվիլիին, Սալոմե Սամադաշվիլիին, Թամար Կորձաիային, Թամար Չարկվիանիին, Քեթևան Թուրազաշվիլիին, Անա Ցիթլիձեին, Լևան Խաբեիշվիլիին, Դավիթ Խաջիշվիլիին, Գիորգի Գոդաբրելիձեին, Խատիա Դեկանոիդաձեին, Նիկա Մաճուտաձեին, Թինա Բոկուչավային և Թեոնա Աքուբարդիային։ Պատգամավորներ Իագո Խվիչիան, Անա Նացվլիշվիլին, Պաատա Մանջգալաձեն և Դավիթ Ուսուփաշվիլին ի նշան բողոքի լքել են նիստը։

«Այն պայմաններում, երբ դեռ օրենքի նախագիծ է, դեռ օրենք չէ, այսօր ինչ մեթոդներ որ կիրառում եք, ռեպրեսիվ մեթոդներ, սա ցույց է տալիս, թե ինչու է ձեզ պետք այս օրենքը։ Սա խորհրդարանական քննարկում չէ, ոչ էլ ժողովրդավարական քննարկում է։ Շատ լավ է, որ ամեն ինչ արձանագրվում է, քանի որ պետական ​​դավաճանության համար մեղադրական եզրակացությանը պետք կգան այն հայտարարությունները, որոնք դուք արել եք այստեղ»,- նիստը լքելուց առաջ ասել է «Լելո»-ի անդամ Անա Նացվլիշվիլին։

«Գիրչի»-ի անդամ Իագո Խվիչիայի կարծիքով՝ նիստը շինծու էր, և նույնիսկ տեխնիկական տեսանկյունից օրենքը չի կարող ընդունված համարվել երկրորդ ընթերցմամբ։ «Սա կանոնների խախտմամբ ընդունված օրենք է, որի քննարկմանը ներգրավված չեն եղել բնակչության ներկայացուցիչները»,- ասել է Խվիչիան։

Անրի Օխանաշվիլին հանձնաժողովից հեռացրել է ոչ կառավարական կազմակերպությունների մի քանի ներկայացուցիչների, այդ թվում՝ տարածաշրջանային հեռարձակողների ասոցիացիայի տնօրեն Նաթիա Կուպրաշվիլիին և «Թրանսփարենսի Ինթերնեշնլ-Վրաստան»-ի խորհրդարանական քարտուղար Լիկա Սաջաիային, ովքեր կարծում են, որ ռուսական օրենքի բոլոր հոդվածները խնդրահարույց են և կխաթարեն երկրում ժողովրդավարությունը։

2024 թվականի ապրիլի 3-ին «Վրացական երազանքը» կրկին օրակարգ բերեց այսպես կոչված «օտարերկրյա գործակալների» մասին ռուսական օրենքը, որը մեկ տարի առաջ բազմահազարանոց բողոքի ակցիաներից հետո ետ կանչվեց, և եղավ խոստում, որ այն երբեք չի ընդունվի։ «Ռուսական օրենքը» պարտավորեցնում է անկախ լրատվամիջոցներին և ոչ կառավարական կազմակերպություններին, որոնք աշխատում են միջազգային կազմակերպությունների դրամաշնորհային աջակցությամբ և չեն վերահսկվում կառավարության կամ նրա հետ կապված խմբերի կողմից, գրանցվել որպես օտարերկրյա գործակալ։ 150-ից ավելի հասարակական և լրատվական կազմակերպություններ հայտարարություն են տարածել, որ ոչ մի դեպքում չեն գրանցվի «արժանապատվությունը ոտնահարող ռեգիստրում»։