Զուրաբիշվիլիին այլևս նախագահության արժանի չենք համարում, նա պետք է գնա. Կոբախիձե

«Իմփիչմենթի ընթացակարգ սկսելը քաղաքական որոշում է։ 2022 թվականին մենք նաև քաղաքական հայտարարություն արեցինք, որ Վրաստանի նախագահը խախտել է Վրաստանի Սահմանադրությունը։ Նա 2022 թվականի ապրիլին դիմեց կառավարություն, եթե չեմ սխալվում, այցերի հավանություն ստանալու համար, մերժում ստացավ, և նախագահը այնուամենայնիվ կատարեց համապատասխան այցերը, թեև մենք այն ժամանակ քաղաքական այս որոշումը չընդունեցինք, քանի որ ինչ-որ պահի նա փոխել է այս պրակտիկան և որոշակի ժամանակահատվածում չի խախտել սահմանադրությունը։ Նա խորհրդակցություններ է անցել, և հետագայում որոշակի այցերի համաձայնություն է տրվել։ Սակայն քաղաքական որոշումը կայացվել է միայն այն բանից հետո, երբ նախագահի կողմից Վրաստանի Սահմանադրության խախտումը համակարգային բնույթ է ստացել։

Երբ իմփիչմենթի հարց ենք առաջ քաշում, մեր տեսանկյունից դա նշանակում է, որ մենք Սալոմե Զուրաբիշվիլիին այլևս արժանի չենք համարում նախագահի պաշտոնը։

հայտարարել է Կոբախիձեն Սահմանադրական դատարանում, որտեղ վերսկսվել է նախագահի իմփիչմենթի դիմումների քննարկումը։ Դատավոր Եվա Գոցիրիձեն Կոբախիձեին հարցրել է, թե որն է «Վրացական երազանքի» մոտիվացիան սկսելու իմփիչմենթի ընթացակարգը։

«Մենք ի սկզբանե ասել ենք, որ 100 ձայն չենք ակնկալում։ Մենք հիմնավոր ենթադրություն ունենք, որ տիկին Սալոմե Զուրաբիշվիլին խախտում էր Վրաստանի Սահմանադրությունը՝ ընդդիմության աջակցությունը ստանալու ակնկալիքով։ Այն դեպքում, երբ Սահմանադրական դատարանը դրական եզրակացություն ներկայացնի խորհրդարանին Սահմանադրության խախտման վերաբերյալ, բոլոր համապատասխան պատգամավորները կաջակցեն նախագահի իմփիչմենթին։ Դա մեր քաղաքական մտադրությունն է»,- ասել է Կոբախիձեն։

Նրա պարզաբանմամբ՝ իմփիչմենթի գործընթացի մեկնարկը, բացի քաղաքականից, ունի նաև իրավական դրդապատճառ, որպեսզի Սահմանադրական դատարանը հաստատի, որ գործող համակարգը խորհրդարանական է, որտեղ Վրաստանի նախագահը չի կարող ներխուժել կառավարության բացառիկ լիազորությունների մեջ։

«Ձեր որոշումը նախադեպային արժեք է ունենալու։ Եթե ​​ենթադրենք տեսական վարկածը, որ դուք չեք սատարում այս պնդումը, խորհրդարանական կառավարման համակարգը գլխիվայր շուռ կգա»,- դիմեց նա դատավորներին։

Սահմանադրական դատարանը մինչև հոկտեմբերի կեսերը եզրակացություն կպատրաստի նախագահի իմփիչմենթի վերաբերյալ։ Եթե ​​դատարանը հաստատի, որ նախագահը խախտել է սահմանադրությունը, ապա նախագահին հեռացնելու համար անհրաժեշտ է խորհրդարանի 100 պատգամավորի քվեն, ինչը «Վրացական երազանքը» չունի։ Խորհրդարանական ընդդիմության մի մասը նախագահի իմփիչմենթին դեմ է և համարում է որ դա սաբոտաժ է լինելու և կխոչընդոտի Վրաստանի եվրաինտեգրմանը։