Aİ-yə üzv olan 27 ölkənin xarici işlər nazirləri bazar ertəsi, mayın 27-də Gürcüstandakı mövcud vəziyyəti müzakirə edəcəklər. Bu barədə Xarici Fəaliyyət Xidmətinin mətbuat katibi Peter Stano bu gün Brüsseldə keçirilən brifinqdə bildirib.
Əsas xəbərlər
Stano qeyd edib ki, Gürcüstanla Avropa İttifaqı arasında münasibətlərin gələcəyini üzv dövlətlər son hadisələri nəzərə alaraq müəyyən edəcək.
“Bazar ertəsi Avropa İttifaqının xarici işlər nazirlərinin müzakirə edəcəyi mövzulardan biri, xüsusən də xarici şəffaflıq qanunu ətrafında gördüyümüz ciddi hadisələrə görə Gürcüstan olacaq.
Mən yalnız bir şeyi təkrar edə bilərəm ki, Avropa İttifaqı gürcü xalqının tərəfdaşı və dostudur, onların əksəriyyəti Avropa yolu ilə getmək arzusunu ifadə edib. Ona görə də Gürcüstan hökuməti Aİ-yə üzvlük üçün müraciət edib. Və Aİ-yə müraciət və üzvlük prosesi o deməkdir ki, müəyyən kriteriyalar var ki, onlara cavab verilməlidir.
Prezidentin ona veto qoymasından sonra Gürcüstan parlamentində yenidən müzakirə olunan qanun Gürcüstanı Avropa İttifaqına yaxınlaşdırmır, çünki bu qanunun ruhu Avropa prinsiplərinə və dəyərlərinə uyğun gəlmir - bu Gürcüstan hakimiyyətinin müdafiə etmək istəyini bəyan etdiyi prinsiplər və dəyərlərdir”, - Piter Stano bildirib.
Onunsözlərinə görə, Aİ nümayəndələri gürcü dostları və tərəfdaşları ilə birlikdə Aİ üzvlüyünə namizəd statusunun nə demək olduğunu aydınlaşdırmaq üçün çalışırlar.
Bir neçə gün əvvəl “Financial Times” məlumat yaydı ki, hökumətin “xarici agentlər” qanunu ilə bağlı təxribatçı mövqeyinə cavab olaraq bir neçə Aİ ölkəsi Gürcüstana qarşı sanksiyaların tətbiqini, o cümlədən vizasız gediş-gəlişin dayandırılmasını tələb edir. Nəşr yazırdı ki, Aİ xarici işlər nazirlərinin görüşündə çəkindirici tədbirlərin müzakirəsini tələb edəcək ölkələr arasında Estoniya, Hollandiya, Çexiya və İsveç də var. “Financial Times”a məsələ ilə bağlı məlumatlı mənbələr bildiriblər ki, Gürcüstan vətəndaşları üçün Aİ-yə vizasız gediş-gəlişin ləğvi ilə yanaşı, məqsədyönlü sanksiyalar və Aİ-nin maliyyələşdirilməsinin dondurulması da nəzərdən keçirilir.
Avropa İttifaqı və ABŞ-ın mümkün sanksiyalarına baxmayaraq, “Gürcü arzusu” geri çəkilmək niyyətində deyil – mayın 27-28-də prezidentin rus qanununa qoyduğu vetounun aşılması planlaşdırılır.
