“Gürcü Arzusu”nun fəxri sədri Bidzina İvanişvili sabah, mayın 14-də Tbilisiyə gəlməli olan ABŞ dövlət katibinin Avropa və Avrasiya məsələləri üzrə köməkçisi Cim O’Brayenlə görüşdən imtina edib. Bu barədə baş nazir bugünkü brifinqdə məlumat verib. İrakli Kobaxidze qeyd edib ki, görüş “de-fakto sanksiyalar” başa çatdıqdan sonra mümkün olacaq.
Əsas xəbərlər
“Əvvəla, Bidzina İvanişvilinin özü bu məsələni ciddi hesab etmədiyi üçün bu məsələdə (sanksiyalarda) maraqlı deyil. O’Brayenin səfəri ilə bağlı təsdiq edə bilərəm ki, görüşlə bağlı Bidzina İvanişviliyə müraciət olub, Bidzina İvanişvili ondan imtina edib. Bunun öz izahı və tərifi var idi. Bundan əlavə, onu da deyim ki, ötən aylar ərzində Bidzina İvanişvilinin digər xarici diplomat və siyasətçilərlə görüşdən imtina etməsi halları da olub. Müəyyən məsələlərdə razılaşmalı olduğum üçün bu barədə məlumatım var.
Bütün hallarda imtinanın səbəbi eyni olub: Bidzina İvanişvili artıq de-fakto sanksiyalar altında olduğunu bildirib. Onun Qərbə əmanət etdiyi 2 milyard dolları dondurulub və təəssüf ki, bu pullar Qlobal Müharibə Partiyasının əlinə keçib. Ona görə də Bidzina İvanşvilinin mövqeyi ondan ibarətdir ki, o, şantaj altında heç bir görüş keçirə bilməz. Bu, onun çox aydın mövqeyidir. Bu şantaj və de-fakto sanksiyalar bitən kimi dərhal, təbii ki, istənilən görüş keçirilə bilər, lakin bu gün Bidzina İvanişvilinin bu mövzuda mövqeyi belədir.
Ona görə də Ukraynada müharibə başlayandan sonra onun üçün vəsait dondurulan 2022-ci ilin martından bu cür şantaj və təhdidlər heç bir nəticə vermədi və indi də belə şantaj və hədələr işləməyəcək. Heç kim Bidzina İvanişvilini şantaj və təhdid şəraitində dövlət əleyhinə addımlar atmağa məcbur edə bilməz”, - deyən Kobaxidze sanksiyaya şantaj və təhdidlərin də daxil olduğunu bildirib.
Bu gün baş nazirin brifinqindən əvvəl hökumətin təbliğat-təşviqat telekanalı “İmedi” İvanişvilinin “konkret sanksiyalar paketi”ni ABŞ dövlət katibinin köməkçisinə təqdim etdiyini bildirib. “İmedi” yazıb ki, Bidzina İvanişvili ilə görüş olub, söhbət sanksiyalardan gedir. Bu məlumat saat 17:00-da “Kronika” xəbər relizində elan edilib və “imedinews.ge” saytında da dərc edilib, lakin sonradan saytdan itib.
Sabah “Gürcü Arzusu” rus qanununu parlamentin plenar iclasına çıxaracaq və baş nazir Kobaxidzenin dediyi kimi, qəbul olunacaq.
Dövlət Departamenti Gürcüstan hökumətini rus qanununu yenidən irəli sürdüyünə görə dəfələrlə tənqid edib. Rəsmi məlumata görə, O’Brayen Gürcüstanda hökumət, vətəndaş cəmiyyəti və özəl sektor nümayəndələri ilə görüşəcək.
