Rusiyanın bazar ertəsi həyata keçirdiyi raket hücumu nəticəsində ölənlərin sayı 29-a çatıb. Ukrayna Baş Prokurorluğunun məlumatına görə, ölənlər arasında 4 uşaq - 8 və 14 yaşlı iki qız və 8 və 10 yaşlı iki oğlan da var. Yaşları 2 ilə 17 arasında olan 10 uşaq müxtəlif dərəcəli xəsarətlər alıb.
Əsas xəbərlər
Ukraynanın Fövqəladə Hallar Xidmətinin məlumatına görə, paytaxtda 10-u uşaq olmaqla 117 nəfər xəsarət alıb.
Dünən, iyulun 8-i səhər saatlarında Rusiya Ukraynaya iri raket hücumu həyata keçirib. Kiyevin Şevçenkovski rayonunda yerləşən və ən ağır xəstələrin müalicə olunduğu ölkənin ən böyük uşaq xəstəxanası “Oxmatdit” bombalanıb. Məlumdur ki, uşaq xəstəxanasında iki nəfər - həkim və xəstələrdən birinin qohumu həlak olub, 50-dən çox yaralı var.
Mərmi “Adonis” özəl klinikasına da düşüb, KİV-in məlumatına görə, beş tibb işçisi və iki xəstə həlak olub.
Ukrayna Təhlükəsizlik Xidmətinin məlumatına görə, Rusiya uşaq xəstəxanasını “Kh-101” strateji qanadlı raketlə vurub. Qurum hücum yerində tapıldığı iddia edilən raket fraqmentlərinin fotolarını yayıb.
Rusiya Müdafiə Nazirliyinin məlumatına görə, onlar Ukrayna silahlı qüvvələrinin hərbi sənaye obyektlərinə və aviabazalarına hücumlar həyata keçiriblər və mülki obyektlərə hədəflənmiş raket hücumu barədə məlumat “tamamilə həqiqətə uyğun deyil”. Rusiya tərəfi heç bir dəlil olmadan iddia edir ki, mülki obyektlər Ukraynanın hava hücumundan müdafiə raketləri ilə zədələnmiş ola bilər.
Ukrayna prezidenti Volodimir Zelenski Kremlin bəyanatlarını “həyasızlıq” adlandırıb. Onun ofisinin məlumatına görə, Ukraynada dünənki raket hücumu nəticəsində azı 38 nəfər həlak olub, 190 nəfər yaralanıb.
