“Təəssüf ki, bu yardımlar əsasən onların burada mövcudluğuna xidmət edir və bizim vətəndaşlarımıza, hökumətin fəaliyyətinə, pensiyaya, maaşa, səhiyyəyə, müdafiəyə və ya hər hansı digər istiqamətə birbaşa təsir göstərmir”, - “Gürcü Arzusu” deputatı İrakli Kadaqişvili qərbli tərəfdaşların Gürcüstana yardımın dayandırılması ilə bağlı suala cavab verib.
Əsas xəbərlər
Kadaqişvilinin fikrincə, bu cür qərarlar seçkiqabağı prosesdə vəziyyətin gərginləşməsinə “müəyyən dərəcədə töhfə verir”.
“Bu, seçkilər öncəsi əhalini şantaj etmək və hansısa yolla “Lelo” və “Milli Hərəkat” kimi partiyaları spekulyasiya üçün həyati oksigenlə təmin etmək cəhdidir. Bu, acınacaqlı və çox təəssüf doğuran faktdır. Gürcüstan kifayət qədər təcrübəyə və demokratiyaya gedən yolda aydın irəliləyişə malik müstəqil dövlətdir. Ölkə bu anlaşılmazlığı aşacaq. Parlament seçkilərindən və Ukraynada müharibə başa çatdıqdan sonra vəziyyət normallaşmaya doğru gedəcək”, - Kadaqişvili bildirib.
Avqustun 1-də İspaniyanın “Europa Press” nəşrinə müsahibəsində Avropa İttifaqının Xarici İşlər Xidmətinin sözçüsü Piter Stano Aİ-nin qondarma “agentlər” haqqında rus qanunun qüvvəyə minməsi ilə bağlı narahatlığını təkrarlayıb və Avropa İttifaqının Gürcüstan hökumətinə maliyyə yardımının dayandırılması məsələsini nəzərdən keçirdiyini bildirib.
Avropa İttifaqı artıq Avropa Sülh Mexanizmi çərçivəsində Gürcüstanın müdafiəsi üçün nəzərdə tutulan 30 milyon avronu dondurub.
Avropa İttifaqının və NATO-nun üzvü olan Danimarka da hökumətin dəstəyini tam nəzərdən keçirir. Danimarka Müdafiə Nazirliyi Gürcüstanla ötən il başlayan və ümumi büdcəsi təxminən 28 milyon lari olan dörd illik hərbi əməkdaşlığı artıq dayandırıb.
Rus qanununun qəbulundan sonra ABŞ Gürcüstanla ikitərəfli əməkdaşlığın hərtərəfli nəzərdən keçirilməsinə başlayıb. İcmal çərçivəsində ABŞ Müdafiə Nazirliyi iyulun sonunda Gürcüstanda başlamalı olan “Layiqli Tərəfdaş 2024” hərbi təlimini qeyri-müəyyən müddətə təxirə salıb. İyulun 31-də dövlət katibi Entoni Blinken ABŞ-ın Gürcüstan hökumətinə birbaşa fayda verən 95 milyon dollardan çox yardımı dayandırdığını bəyan edib. Yardımın dayandırılmasına səbəb, Blinkenin sözlərinə görə, hökumətin Aİ və NATO-ya üzvlük normalarına uyğun gəlməyən “antidemokratik hərəkətləri və yalan bəyanatları”dır.
