„სამწუხაროდ, ეს დახმარებები, ძირითადად, მათ აქ ყოფნას ემსახურება და პირდაპირი გავლენა ჩვენს მოქალაქეებზე, მთავრობის ფუნქციონირებაზე, ან პენსიაზე, ხელფასზე, ჯანდაცვაზე, თავდაცვასა თუ ნებისმიერ სხვა მიმართულებაზე არა აქვს“, - ასე უპასუხა „ქართული ოცნების“ დეპუტატმა ირაკლი ქადაგიშვილმა დასავლელი პარტნიორების მხრიდან საქართველოსთვის დახმარებების შეჩერების შესახებ დასმულ შეკითხვას.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 6 მოხელის შეფასება 6 თვეში ერთხელ და ხელფასის 20%-ის დაკავება - რა ცვლილებები მიიღო „ოცნებამ“
ქადაგიშვილის თქმით, მსგავსი გადაწყვეტილებები „გარკვეულწილად ხელს უწყობს“ წინასაარჩევნო პროცესში სიტუაციის დაძაბვას.
„ეს არის მცდელობა იმისა, რომ მოსახლეობა არჩევნების წინ შანტაჟის ქვეშ ამყოფონ და რამენაირად „ლელოს“ და „ნაციონალური მოძრაობის“ მსგავს პარტიებს სპეკულაციისთვის სასიცოცხლო ჟანგბადი მიაწოდონ. ეს არის სამწუხარო და ძალიან დასანანი ფაქტი. საქართველო საკმაო გამოცდილების მქონე დამოუკიდებელი სახელმწიფოა, რომელსაც დემოკრატიის გზაზე აშკარა პროგრესი გააჩნია. ქვეყანა ამ გაუგებრობას გადალახავს. საპარლამენტო არჩევნებისა და უკრაინაში ომის დასრულების შემდეგ ვითარება ნორმალიზაციისკენ წავა“, - აღნიშნა ქადაგიშვილმა.
ევროკავშირის საგარეო სამსახურის პრესსპიკერმა, პიტერ სტანომ 1-ელ აგვისტოს, ესპანურ გამოცემა Europa Press-თან ინტერვიუში გაიმეორა ევროკავშირის შეშფოთება ე.წ. აგენტების შესახებ რუსული კანონის ძალაში შესვლის გამო და განაცხადა, რომ ევროკავშირი საქართველოს მთავრობისთვის ფინანსური დახმარების შეჩერების საკითხს განიხილავს.
ევროკავშირმა უკვე გაყინა 30 მილიონი ევრო, რომელიც ევროპის სამშვიდობო მექანიზმის ფარგლებში საქართველოს თავდაცვის სფეროსთვის იყო განკუთვნილი.
მთავრობის მხარდაჭერის სრულ გადახედვას აწარმოებს დანიაც, ევროკავშირისა და ნატოს წევრი სახელმწიფო. დანიის თავდაცვის სამინისტრომ უკვე შეაჩერა საქართველოსთან გასულ წელს დაწყებული ოთხწლიანი სამხედრო თანამშრომლობა, რომლის ჯამური ბიუჯეტი დაახლოებით 28 მილიონი ლარი იყო.
რუსული კანონის მიღების შემდეგ, აშშ-მა საქართველოსთან ორმხრივი თანამშრომლობის ყოვლისმომცველი გადახედვა დაიწყო. გადახედვის ფარგლებში, შეერთებული შტატების თავდაცვის დეპარტამენტმა სამხედრო სწავლება „ღირსეული პარტნიორი 2024“, რომელიც საქართველოში ივლისის ბოლოს უნდა დაწყებულიყო, გაურკვეველი ვადით გადადო. 31 ივლისს კი, სახელმწიფო მდივანმა, ენტონი ბლინკენმა განაცხადა, რომ აშშ აჩერებს 95 მილიონ დოლარზე მეტ დახმარებას, რომელსაც პირდაპირი სარგებელი მოაქვს საქართველოს მთავრობისთვის. დახმარების შეჩერების მიზეზი მთავრობის „ანტიდემოკრატიული ქმედებები და ცრუ განცხადებებია“, რომლებიც, ბლინკენის თქმით, არ შეესაბამება ევროკავშირისა და ნატოს წევრობის ნორმებს.
