ევროკავშირის საგარეო საქმეთა და უსაფრთხოების პოლიტიკის პრესსპიკერმა, პიტერ სტანომ კიდევ ერთხელ გაიმეორა ევროკავშირის შეშფოთება საქართველოში ე.წ. აგენტების შესახებ რუსული კანონის ძალაში შესვლის გამო და განაცხადა, რომ მთავრობისთვის დახმარების შეჩერების საკითხი განიხილება.
ახალი ამბები
მკითხველის რჩეული
- 1 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 2 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 3 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 4 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 5 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 6 მოხელის შეფასება 6 თვეში ერთხელ და ხელფასის 20%-ის დაკავება - რა ცვლილებები მიიღო „ოცნებამ“
ესპანურ გამოცემა Europa Press-სთან პიტერ სტანომ თქვა, რომ ევროკავშირი „ძალიან შეშფოთებულია საქართველოში ბოლო დროს განვითარებული მოვლენებით“ და ძალაში შესული რუსული კანონი წარმოადგენს „უკანდახევას“ ქვეყნის ევროკავშირში ინტეგრაციისკენ გადადგმულ ნაბიჯებში.
პიტერ სტანოს განცხადებით, მოკლევადიან პერსპექტივაში ევროკავშირმა უკვე შეამცირა პოლიტიკური კონტაქტები საქართველოს ხელისუფლებასთან, მათი გამოკლებით, „ვინც ორიენტირებულია არსებული სიტუაციიდან გამოსავლის პოვნაზე“.
„ჩვენ განვიხილავთ მთავრობისთვის ფინანსური დახმარების შეჩერების შესაძლებლობას“, - აღნიშნა სტანომ მას შემდეგ რაც თქვა, რომ ევროკავშირმა უკვე გაყინა ევროპის სამშვიდობო მექანიზმის ფარგლებში სამხედრო დახმარებისთვის დაგეგმილი 30 მილიონი ევრო.
ორი დღის წინ ამერიკის შეერთებული შტატების სახელმწიფო მდივანმა, ენტონი ბლინკენმა განაცხადა, რომ აშშ საქართველოს მთავრობას 95 მლნ დოლარის დახმარებას შეუჩერებს, ანტიდემოკრატიული ქმედებებისა და სიცრუის შემცველი განცხადებების გამო, რომლებიც არ შეესაბამება ევროკავშირსა და ნატოში წევრობის ნორმებს.
28 მაისს, საერთაშორისო პარტნიორების მოწოდებებისა და მრავალათასიანი საპროტესტო აქციების მიუხედავად, „ქართულმა ოცნებამ“ პრეზიდენტის ვეტო დაძლია და რუსული კანონი საბოლოოდ მიიღო. კანონი „უცხოური ძალის ინტერესების გამტარებელებად“ აცხადებს ყველა არასამთავრობო და მედია ორგანიზაციას, რომელთა შემოსავლის 20%-ზე მეტი საერთაშორისო ორგანიზაციებიდან მიღებული გრანტია. ასზე მეტმა ორგანიზაციამ განაცხადა, რომ რუსულ კანონს არ დაემორჩილებიან.
რუსული კანონი საკონსტიტუციო სასამართლოშია გასაჩივრებული. იმ შემთხვევაში, თუ მისი მოქმედებას არ შეჩერდება, 2 სექტემბრიდან, არასამთავრობო და მედია ორგანიზაციების წინააღმდეგ მძიმე საჯარიმო სანქციები ამოქმედდება.
