Moldova Respublikasının Konstitusiya Məhkəməsi rusiyayönümlü “Şor” partiyasını konstitusiyaya zidd elan edib. Məhkəmə, şikayətin müəllifi olan hökumətin, partiyanın ölkənin suverenliyini və müstəqilliyini təhdid etməsi ilə bağlı arqumentləri ilə razılaşıb. “Şor”un nümayəndələri Avropa İnsan Haqları Məhkəməsinə müraciət etmək niyyətindədirlər.
Əsas xəbərlər
İyunun 19-da Konstitusiya Məhkəməsinin sədri Nikolay Roşka qərarı elan edərkən bildirib ki, qərar qəbul edildiyi andan “Şor” partiyası ləğv olunmuş hesab olunur, partiyanın sənədləri hüquqi qüvvəyə malik deyil. Ədliyyə nazirliyi ləğvetmə komissiyası yaratmalı və “Şor”u hüquqi şəxslər reyestrindən çıxarmalıdır. Partiyanın parlamentdəki deputatları mandatlarını saxlayacaqlar, lakin müstəqil üzv statusundan istifadə edəcəklər və digər fraksiyalara qoşulmaq hüquqları olmayacaq. Konstitusiya Məhkəməsinin əsaslandırılmış qərarı hələlik dərc edilməyib.
Moldova prezidenti Maia Sandu qərarı şərh edib və ictimaiyyətin bunu gözlədiyini bildirib.
“Korrupsiya yolu ilə yaradılmış və konstitusiya sistemi və dövlətin təhlükəsizliyi üçün korrupsiya təhdidi olan partiya”, - deyən Sandu Moldovanın korrupsionerləri cəzalandıran və dövlət vəsaitlərinin şəxsi məqsədlər üçün istifadəsinin qarşısını alan dövlətə çevrilməli olduğunu qeyd edib.
“Şor” partiyası, onun təsisçisi və lideri, oliqarx İlan Şorun adını daşıyır. O, bank fırıldaqçılığı və çirkli pulların yuyulması ittihamı ilə qiyabi olaraq 15 il müddətinə azadlıqdan məhrum edilib. 2019-cu ildə o, ölkədən qaçıb. İlan Şor İsrail vətəndaşlığına malikdir və Moldova hüquq-mühafizə orqanlarının məlumatına görə, o, məhz İsraildədir. O, sosial şəbəkələrdən istifadə edərək həmkarları ilə ünsiyyət qurur və Moldova hökumətini dəyişmək istədiyini gizlətmir.
“İlk növbədə məhkəmənin qərarını ölkənin əsas müxalifət partiyasına qarşı total mübarizə kimi qiymətləndiririk. İkincisi - bu qərar şəxsən mənə və ya partiyaya zərbə deyil, “Şor” partiyasını dəstəkləyən yüz minlərlə Moldova vətəndaşının üzünə vurulan sillədir. Üçüncüsü - bu qərarı prezident Maia Sandunun şəxsi vəkili olan və qızı prezidentin aparatında işləyən Konstitusiya Məhkəməsinin sədri verib.
Biz birmənalı olaraq inanırıq ki, hər şey Amerika Birləşmiş Ştatları və Avropa İttifaqı səfirliklərinin koordinasiyası ilə baş verib”, - İlan Şor Rusiyanın “Rossia 24” dövlət televiziyasına müsahibəsində bildirib.
2021-ci ildə keçirilən parlament seçkilərində “Şor” partiyası 5,74%s əs toplayıb və parlamentə beş deputat daxil edə bilib. Partiya liderinin sözlərinə görə, onlar Konstitusiya Məhkəməsinin qərarına tabe olmayacaq və növbəti seçkilərdə iştirak etmək üçün qanuni yollar tapacaqlar.
2023-cü ilin mayında Avropa İttifaqı Moldovada vəziyyətin sabitliyini pozduğuna görə İlan Şora və onun partiyasının üzvü Marina Tauberə qarşı sanksiyalar tətbiq edib. Şora Amerika Birləşmiş Ştatları tərəfindən də sanksiya tətbiq edilir.
