Amerika Birləşmiş Ştatlarının prezidenti Co Bayden bildirib ki, rusiyalı müxalifətçi Aleksey Navalninin ölümünə görə Rusiya prezidenti Vladimir Putin məsuliyyət daşıyır.
Əsas xəbərlər
“Rusiya hökuməti öz hekayəsini danışmağa hazırlaşır. Səhv etməyək: Navalninin ölümünə görə məsuliyyəti Putin daşıyır”, - media Baydenin bəyanatından sitat gətirir. “Navalninin başına gələnlər Putinin vəhşiliyinin növbəti təsdiqidir. Putin təkcə xarici ölkələrin vətəndaşlarını hədəf almır - biz indi Ukraynada baş verənləri görürük - öz xalqına qarşı da dəhşətli cinayətlər törədir”.
Co Baydenin sözlərinə görə, Aleksey Navalninin ölüm xəbəri onu narahat edib. ABŞ prezidenti deyib ki, Navalni “korrupsiyaya, zorakılığa və Putin hökumətinin etdiyi hər şeyə qarşı cəsarətlə dayanıb. Buna cavab olaraq Putin onu zəhərləyib, həbs edib, uydurma cinayətlərə görə mühakimə edib”.
Baydenin sözlərinə görə, Aleksey Navalni hətta həbsxanada da həqiqətin güclü səsi olub.
“Rusiyada və bütün dünyada insanlar bu gün Navalniyə yas tutur, çünki onda, Putində olmayan çox şeylər idi. O, cəsarətli idi. Prinsipial idi. O, qanunun aliliyinin mövcud olduğu Rusiyanı qurmaq istəyirdi. O, belə bir Rusiyaya inanırdı və bunun uğrunda mübarizə aparmağa və hətta uğrunda ölməyə dəyər bir səbəb olduğuna inanırdı. 2020-ci ildə sui-qəsdə məruz qaldıqdan və az qala öldürüldükdən sonra qaşqın kimi təhlükəsiz yaşaya bilərdi. Əvəzində o, Rusiyaya qayıtdı - işinə davam etsə, yəqin ki, həbs olunacağını, bəlkə də öldürüləcəyini bilirdi, lakin o, ölkəsinə, Rusiyaya çox inandığı üçün bunu etdi” - dedi Co Bayden.
Jurnalistlərdən birinin bunun sui-qəsdin olub-olmaması ilə bağlı sualına prezident Bayden belə cavab verib: “Nə baş verdiyini dəqiq bilmirik, lakin Navalninin ölümünün Putin və onun quldurlarının etdiklərinin nəticəsi olduğuna şübhə yoxdur”.
Co Baydenin fikrincə, bu xəbər ABŞ-ı oyandırmalıdır ki, Ukraynaya maliyyə ayırsın ki, o Rusiyadan qorunmağa davam etsin.
Fevralın 16-da məlum olub ki, rusiyalı müxalif siyasətçi Aleksey Navalni üç illik həbsdən sonra həbsxanada dünyasını dəyişib. Yamal-Nenta Muxtar Dairəsi Federal Cəzaçəkmə Xidməti bildirib ki, 3 nömrəli İslah Koloniyasında məhbus gəzintidən sonra özünü pis hiss edib və demək olar ki, dərhal huşunu itirib. “Bütün zəruri reanimasiya tədbirləri görülsə də, müsbət nəticə verməyib. Təcili yardım həkimləri məhkumun ölümünü təsdiqləyiblər. Ölümün səbəbləri müəyyənləşdirilir”, - deyə qurumdan bildirilib. “Russia Today” təbliğat kanalı Navalninin ölüm səbəbi kimi qan laxtalanmasını irəli sürüb.
Navalnı 19 il müddətinə azadlıqdan məhrum edilmişdi. 2023-cü ilin sonundan o, cəzasını xüsusi rejimli “Полярный волк” (“Qütb canavarı”) koloniyasında çəkir. Sözügedən koloniya Sibirdə, Yamal yarımadasında, Xarp qəsəbəsində yerləşir. Fevralın 14-də siyasətçinin mətbuat katibi Kira Yarmiş bəyan edib ki, Navalni həbsdə olduğu müddətdə 27-ci dəfə 15 günlük cəza kamerasına salınıb.
