2024-cü ilin birinci rübündə Gürcüstanda orta aylıq nominal əmək haqqı ötən ilin müvafiq dövrü ilə müqayisədə 13,2% (226,8 lari) artaraq 1943,4 lari təşkil edib. Qeyd edək ki, 2023-cü ilin sonunda orta aylıq əmək haqqı  2044,5 lari olub.

Milli Statistika Xidmətinin məlumatına görə, yanvar-mart aylarında fəaliyyət növünə görə aşağıdakı sahələrdə nisbətən yüksək əməkhaqqı qeydə alınıb:

  • Maliyyə və sığorta fəaliyyəti - 4519,4 lari (əvvəlki ilin müvafiq dövrü ilə müqayisədə 20,2 faiz artıb);
  • İnformasiya və rabitə – 3956,5 lari (9,0 faiz artıb);
  • Peşə, elmi və texniki fəaliyyət - 2672,7 lari (12,0 faiz artıb);
  • Tikinti - 2624,6 lari (22,3 faiz artıb).
Foto - Sakstatın hesabatından

Yanvar-mart aylarında qadınlarda orta əmək haqqı 1540,0 lari, kişilərdə isə 2343,2 lari olub. İllik maaş artımı qadınlarda 164,3 lari (11,9%), kişilərdə isə 289,8 lari (14,1%) təşkil edib. Fəaliyyət növlərinə görə bütün sahələrdə kişilərin əmək haqqı qadınların maaşından yüksək olub.

2024-cü ilin birinci rübündə biznes sektorunda muzdla çalışan işçilərin orta aylıq əmək haqqı 226,3 lari (12,9%) artaraq 1985,4 lari təşkil edib. Fəaliyyət növlərinə görə ən yüksək əmək haqqı informasiya və rabitə (əvvəlki ilin müvafiq dövrü ilə müqayisədə 8,8 faiz artaraq 4069,0 lari təşkil edib) və peşə, elmi və texniki fəaliyyət (10,9 faiz artaraq 3035,1 lari təşkil edib) sahələrində qeydə alınıb.

Qeyri-sahibkarlıq və maliyyə sektorunda orta aylıq əmək haqqı ötən ilin müvafiq dövrü ilə müqayisədə 226,8 lari (13,8%) artaraq 1870,0 lari təşkil edib. Fəaliyyət növünə görə maliyyə və sığorta fəaliyyətində çalışanlar nisbətən yüksək orta əmək haqqına malikdirlər.

Ən yüksək orta aylıq əmək haqqı Tbilisidədir və 2305 laridir. Sonra 1680,2 lari ilə Mtsxeta-Mtianeti bölgəsi, daha sonra isə 1564,5 lari ilə Acara gəlir. Ən aşağı orta aylıq əmək haqqı Raça-Leçxumi və Kvemo Svaneti regionundadır və 996,8 lari təşkil edir.

Gürcüstan xəbərləri
Gürcüstan xəbərləri
müstəqil, ictimai-siyasi onlayn nəşrdir. Vebsayt İnformasiya Resursları Şəbəkəsi (IRN) tərəfindən idarə olunur