Gürcüstan prezidenti Salome Zurabişvili “xarici agentlər” haqqında rus qanununu Konstitusiya Məhkəməsinə şikayət edəcək. Bu barədə prezidentin parlament katibi Qiorqi Msxiladze bu gün keçirilən brifinqdə məlumat verib.
Əsas xəbərlər
“Gürcüstan prezidenti ilk dəfə olaraq Gürcüstanın Konstitusiya Məhkəməsinə şikayət ərizəsi ilə müraciət edir. Şikayət “rus qanunu” adlanan “Xarici Təsirin Şəffaflığı Qanunu”na aiddir. Sözügedən qanun konstitusiyaya ziddir. Bu, Gürcüstan Konstitusiyasının 78-ci maddəsinə ziddir. Şikayət həmçinin Konstitusiya ilə təmin edilmiş bir sıra fundamental hüquqları pozan bir sıra normalara etiraz edir. Bu şikayət vasitəsilə prezident sözügedən qanunun fəaliyyətinin dayandırılmasını və onun qəti şəkildə ləğvini tələb edir”, - deyə Msxiladze bildirib.
Konstitusiya Məhkəməsində cavabdeh (qarşı) tərəf Gürcüstan parlamenti olacaq.
Mayın 28-də “Gürcü Arzusu”nun parlament çoxluğu prezidentin vetosunu aşaraq, nəhayət, rus qanununu qəbul edib. Qanun parlamentin sədri Şalva Papuaşvilinin imzası ilə qüvvəyə minib.
Qanuna görə, gəlirlərinin 20%-dən çoxunu beynəlxalq təşkilatlardan aldığı qrantlar təşkil edən bütün qeyri-hökumət təşkilatları və medialar xarici dövlətin maraqlarını həyata keçirən təşkilat kimi qeydiyyatdan keçməlidir. Belə təşkilatlar avqust ayında Dövlət Reyestr Agentliyinə ərizə ilə müraciət etməli və xarici dövlətin maraqlarını həyata keçirən təşkilat kimi qeydiyyatdan keçməyi tələb etməlidir.
Qeydiyyatdan yayınmaq və ya müəyyən edilmiş müddətdə maliyyə bəyannaməsini təqdim etməmək 25.000 lari məbləğində cərimə ilə nəticələnir. Qanunda Ədliyyə Nazirliyinin tələblərinin yerinə yetirilməməsinə görə 10 000 və 20 000 lari əlavə cərimələr də nəzərdə tutulub.
Bundan əlavə, Ədliyyə Nazirliyi tələb olunan məlumatların təqdim edilməməsinə görə bütün şəxsləri (fiziki şəxslər də daxil olmaqla) 5000 lari məbləğində cərimələmək hüququna malikdir. Ədliyyə Nazirliyi fiziki şəxslərdən şəxsi məlumatları, kommersiya, peşəkar və məxfi məlumatları tələb edə bilər.
Yüzdən çox ictimai təşkilat və onlayn nəşriyyat “agent” reyestrində qeydiyyatdan keçməyəcəklərini bəyan edib. Bəzi təşkilatlar rus qanunundan Gürcüstanın Konstitusiya Məhəkəməsinə və Avropa İnsan Haqları məhkəməsinə şikayət etməyi planlaşdırır.
