Rusiya müxalifətinin lideri Aleksey Navalni martın 1-də Moskvada dəfn edilib. “BBC”nin rus xidmətinin məlumatına görə, hökumətin xəbərdarlığına baxmayaraq, siyasətçi ilə vidalaşmağa minlərlə insan gəlib.
Əsas xəbərlər
Aleksey Navalninin cəsədi əvvəlcə morqdan Marino rayonundaki kilsəyə köçürülüb. Səhərdən ora yüzlərlə polis və “Rosqvardiya” əməkdaşı səfərbər olub. Məbədə gedən yollar dəmir bəndlərlə bağlanıb.
Siyasətçi ilə vidalaşmaq üçün məbədə əsasən mərhumun valideynləri, ailə üzvləri və yaxınları qəbul edilib. Navalninin komandasının məlumatına görə, Rus Kilsəsinin Patriarxlığı kafedralın keşişindən dəfn mərasimini tez bir zamanda başa çatdırmağı xahiş edib.
“Sən qorxmurdun, biz də qorxmuruq”, “Sevgi qorxudan güclüdür”, “Rusiya azad olacaq” – Aleksey Navalninin dəfni zamanı qışqırıqlar, alqışlar eşidilirdi.
Aleksey Navalni Borisov qəbiristanlığında dəfn edilib. Mərasim Frank Sinatranın “My Way” mahnısının instrumental versiyası fonunda keçirilib.
Həyat yoldaşı və övladları, o cümlədən hakimiyyətin təqiblərinə görə xaricdə yaşamağa məcbur olan bir çox ən yaxın yoldaşları siyasətçini son səfərində müşayiət edə bilməyiblər.
KİV-in məlumatına görə, məbədin yaxınlığında bir neçə xarici diplomat, o cümlədən ABŞ, Almaniya və Fransa səfirləri görüntülənib. Hökumətin qarşıdan gələn seçkilərdə prezidentliyə namizəd kimi qeydiyyatdan keçməsinə icazə verməyən siyasətçi Boris Nadejdin də Navalni ilə vidalaşmağa gəlib.
Aleksey Navalninin dəfnindən bir neçə saat sonra Borisov qəbiristanlığında uzun növbə yaranıb. KİV-in məlumatına görə, hüquq-mühafizə orqanlarının əməkdaşları qəbiristanlığın bağlandığını və vətəndaşların daha ora daxil olmasına icazə verilmədiyini açıqlayıb.
Rusiyanın müxtəlif şəhərlərində insanlar Aleksey Navalninin xatirəsini ehtiramla yad ediblər. “OVD İnfo” nəşrinin məlumatına görə, 19 şəhərdə azı 128 vətəndaş həbs edilib. Xaricdə də yad etmə tədbirləri keçirilib.
Rusiyalı müxalifətçi və prezident Vladimir Putinin əsas rəqibi Aleksey Navaliı fevralın 16-da 47 yaşında həbsxanada vəfat edib. O, Arktika Dairəsindən 60 kilometr şimalda, Xarp qəsəbəsində yerləşən “Qütb Canavarı” koloniyasında 19 illik cəza çəkirdi. Navalninin komandası siyasətçinin Putin tərəfindən öldürüldüyünü iddia edir.
