Yeni xəbərlər

“Niyə bu indi baş verdi? Niyə fevralın 16-da? Mən bu sualın cavabını dəqiq bilirəm və həqiqəti gizlətmək niyyətim yoxdur. Navalni yaxın bir neçə gündə azad etməli idilər, çünki biz onun dəyişdirilməsi ilə bağlı qərara gəlmişdik. Fevralın əvvəlində Putinə qatili, “Ef Es Be”nin zabiti Vadim Krasikovu iki Amerika vətəndaşı və Aleksey Navalni ilə dəyişməyi təklif ediblər. Fevralın 15-i axşam mən danışıqların getdiyi və son mərhələdə olduğu barədə təsdiq aldım. Aleksey fevralın 16-da öldürülüb”, - videoda Pevçix deyir.

Mariya Pevçixin sözlərinə görə, Navalninin ölümündən sonra o, Vladimir Putinə məhbusların mübadiləsi təklifini iş adamı Roman Abramoviçin verdiyini öyrənib.

“Mən Abramoviçdən nə vaxt, harada və hansı şəraitdə bunu etdiyini, Putinin nə dediyini soruşdum, amma təəssüf ki, heç nəyi inkar etməsə də, bu suallara cavab vermədi. Putinə açıq şəkildə dedilər ki, Krasikovu əldə etməyin yeganə yolu onu Navalni ilə dəyişməkdir. Putin düşündü - Navalninin azadlıqda olmasına dözə bilmərəm və onlar prinsipcə Krasikovu dəyişməyə hazır olduqlarına görə, sadəcə olaraq, alver predmetindən qurtulmaq lazımdır, sonra lazım gələrsə, onu başqası ilə dəyişmək olar. Bu tamamilə məntiqsiz, irrasionaldır. Bu, dəli mafiozun davranışıdır, amma məsələ ondadır ki, Putin Navalniyə olan nifrətindən ağlını itirib. O, Navalniyə o qədər dözə bilmir ki, özünün və rasional maraqlarının ziyanına hərəkət edir”, - Mariya Pevçix bildirib.

Rusiyalı müxalifətçinin ölümündən sonra fevralın 18-də Navalnini Krasikovla dəyişməyə hazırlaşdıqlarını ilk olaraq Almaniyanın “Bild” nəşri yazmışdı. Jurnalistlərin fikrincə, danışıqlarda Moskva, Vaşinqton və Berlin iştirak edirmiş və Aleksey Navalni tezliklə azad edilməli imiş.

Rusiya hakimiyyətinin hələ də Zelimxan Xanqoşvilinin qatilini Almaniya həbsxanasından çıxarmağa çalışması faktı fevralın əvvəlində təsdiqlənib. Putin Taker Karlsona verdiyi müsahibədə Rusiyada casusluqda ittiham olunan “Wall Street Journal”ın jurnalisti Evan Qerşkoviçi Krasikovla dəyişməyə hazır olduğunu bildirib. Bundan əvvəl media Rusiyanın narkotik qaçaqmalçılığı ittihamı ilə həbs edilən amerikalı basketbolçu Britni Qrinerin azadlığa buraxılması müqabilində Xanqoşvilinin qatilini azad etməyə çalışdığını yazmışdı. Basketbolçu 10 aylıq həbs cəzasından sonra 2022-ci ilin sonunda ABŞ-a qayıdıb. O, silah alverçisi Viktor Butla mübadilə edilib.

Fevralın 16-da Yamal-Nenta Muxtar Dairəsinin Federal Penitensiar Xidməti bildirib ki, Aleksey Navalni 3 nömrəli İslah Koloniyasında gəzintidən sonra özünü pis hiss edib və demək olar ki, dərhal huşunu itirib. “Bütün zəruri reanimasiya tədbirləri görülsə də, müsbət nəticə verməyib. Təcili yardım həkimləri məhkumun ölümünü təsdiqləyiblər. Ölümün səbəbləri müəyyənləşdirilir”, - deyə agentlik məlumat yayıb. “Russia Today” təbliğat kanalının mənbəyi ölüm səbəbi kimi qan laxtalanmasını göstərib. Fevralın 17-də səhər saatlarında Lyudmila Navalnaya Xarp koloniyasına gəlib. Orada ona deyiblər ki, oğlu “qəfil ölüm sindromu”ndan dünyasını dəyişib.

Fevralın 24-də Navalninin meyitinin ailəsinə təhvil verildiyi məlum olub. Ondan əvvəl mərhum siyasətçinin anası bildirib ki, ona ultimatum verilib və oğlunu gizli şəkildə dəfn etməyi xahiş ediblər.

Müxalif siyasətçinin 47 yaşı var idi. O, cəzasını Sibirin Yamal yarımadasının Xarp qəsəbəsində yerləşən “Qütb Canavarı” adlı xüsusi rejimli koloniyada çəkirdi.