აწიოს ერთი ადგილი, მივიდეს პროკურატურაში და უპასუხოს ყველა შეკითხვას - კალაძე პრეზიდენტზე

„პროკურატურას დაწყებული აქვს გამოძიება და მოწოდებებიც გაკეთდა, რომ ქალბატონმა ზურაბიშვილმა კეთილი ინებოს და წაბრძანდეს, პასუხი გასცეს ყველა შეკითხვას, წარადგინოს მტკიცებულებები. არ გაგიგიათ მოწოდებები აღნიშნულთან დაკავშირებით?! კეთილი ინებოს, აწიოს ერთი ადგილი, მივიდეს და პასუხი გასცეს ყველა შეკითხვას, წარმოადგინოს მტკიცებულებები“, - განაცხადა კალაძემ მედიასთან.

ცენტრალურ საარჩევნო კომისიაში 29 ოქტომბერს განაცხადეს, რომ პრეზიდენტის და ოპოზიციური პოლიტიკური პარტიების წარმომადგენლების მხრიდან არჩევნების „სავარაუდო გაყალბების“ ბრალდებებმა უკვე ფართო მასშტაბი მიიღო, რაც „საჭიროებს კომპლექსური და ობიექტური გამოძიების ჩატარებას“. მეორე დღესვე პროკურატურამ არჩევნების გაყალბების მუხლით სისხლის სამართლის საქმე აღძრა და გამოკითხვაზე პირველი პრეზიდენტი დაიბარა.

გენერალურ პროკურატურაში განმარტეს, რომ სალომე ზურაბიშვილი „უნდა ფლობდეს მტკიცებულებებს 2024 წლის საპარლამენტო არჩევნების შესაძლო გაყალბებასთან დაკავშირებით“. ზურაბიშვილი გამოკითხვაზე მისვლას არ აპირებს. მან პროკურატურას ურჩია, „შეუდგეს თავის საქმეს და პრეზიდენტთან პოლიტიკურ ანგარიშსწორებას მოეშვას“.

პროკურატურაში გამოკითხვაზე დაიბარეს, თუმცა, მისვლას არ აპირებს პარტიის „გახარია - საქართველოსთვის“ თავმჯდომარის მოადგილე ნათია მეზვრიშვილიც. მისი თქმით, აღნიშნული გამოძიება „ყალბია“ და მისი ერთადერთი მიზანია, დაადგინოს, თითქოს, არჩევნები არ გაყალბებულა.