დღეს ქართულ პოლიტიკაში ივანიშვილის გარდა სხვა ოლიგარქი არ არის - ზურაბიშვილი

კითხვაზე - როგორ გესმით ევროპული კომისიის რეკომენდაცია „დეოლიგარქიზაციაზე“, ბიძინა ივანიშვილს ოლიგარქად მიიჩნევთ? - საქართველოს პრეზიდენტი პასუხობს:

„პასუხი დეოლიგარქიზაციაზე, ვფიქრობ, მომავალ არჩევნებშია. ოცდაათი წელია ჩვენ ხელისუფლების ერთპარტიულ სისტემაში ვართ. დეოლიგარქიზაცია ნიშნავს, რომ რაც შეიძლება თავისუფალი არჩევნები გვჭირდება, რეალური კოალიციით, პროევროპული ფრონტით. ორწელიწადნახევარი, სამი წელია მასთან არანაირი კონტაქტი არ მქონია. საგარეო პოლიტიკის გარდა, სხვა საუბარი მასთან არასდროს მქონია. როდესაც ევროკავშირში მოგზაურობიდან დავბრუნდი, მივედი ჩემი მოსაზრების გასაზიარებლად, თუ რა უნდა გაგვეკეთებინა. ეს უფრო მონოლოგი იყო, ვიდრე რეალური დიალოგი. არავინ იცის, ის რას ფიქრობს“, - აცხადებს სალომე ზურაბიშვილი.

ჟურნალისტმა საქართველოს პრეზიდენტს ჰკითხა, არის თუ არა ბიძინა ივანიშვილი რუსული გავლენის ქვეშ?

„ის ოლიგარქია, რომელმაც ქონება რუსეთში დააგროვა. ასე რომ, მენტალიტეტზე გავლენას ახდენს ის, რაც მან წარსულში გამოსცადა. დღეს მსოფლიო ორად იყოფა. ის მათ რიგებშია, ვინც ვერ წარმოიდგენს, რომ რუსეთი დამარცხდება, ამიტომაც  ცდილობს წინასწარ მოერგოს რუსეთის გამარჯვებას, რომელიც შესაძლოა, კიდევ უფრო აგრესიული იყოს.

მისი გავლენით, ხელისუფლებაში მყოფი, ევროპაში განათლებამიღებული ახალგაზრდები აჩვენებენ სისუსტესა და მაამებლურ პოზიციას რუსეთის მიმართ. ეს ახალი გეოპოლიტიკური მოცემულობის ცუდი აღქმაა.

მეორე ნაწილი, განსაკუთრებით, ახალგაზრდები, ფიქრობენ, რომ რუსეთი ვეღარასოდეს იქნება ის, რაც ადრე იყო. ის მრავალი კუთხით უკვე დამარცხდა - სამხედრო თვალსაზრისით და პრესტიჟის მხრივაც: მან ფინეთისა და შვედეთის ნატოში შესვლა მოახდინა და მალე დააჩქარებს უკრაინის, მოლდოვისა და საქართველოს ევროკავშირში ინტეგრაციას. ეს ყველაფერი რუსეთის „წყალობით“ მოხდება, რადგან ჩვენი დღის წესრიგი ასე სწრაფ ტემპზე არ იყო გათვლილი. ამ რუსეთმა წააგო“, - აღნიშნა სალომე ზურაბიშვილმა.

საქართველოს პრეზიდენტმა უპასუხა კითხვას, შეიწყალებს თუ არა ის მიხეილ სააკაშვილს, რისკენაც მას ევროპარლამენტმა მოუწოდა: „გარწმუნებთ, ის ამბობს, რომ უკეთაა. მან არჩევნებისათვის თავისი ოფისი გახსნა. ის სამედიცინო კლინიკაში იმყოფება. მის მიმართ ორი ახალი სასამართლო პროცესია. უცხოეთში წასვლის სურვილის ნაცვლად, ის ხაზს უსვამს, რომ აპირებს საარჩევნო კამპანიაში ჩართვას. სხვა კომენტარი არ მაქვს“.

პრეზიდენტის თქმით, მმართველი პარტიის მხრიდან მისი იმპიჩმენტის მცდელობის მიუხედავად, რომელიც მარცხით დასრულდა, ის არ აპირებს ევროპაში მოგზაურობის შეწყვეტას: „მე საკონსტიტუციო სასამართლოში შევეწინააღმდეგე ამ ბრალდებას, მიუხედავად იმისა, რომ თავად ის სხვა ინსიტიტუციების მსგავსად, ნაკლებად დამოუკიდებელია. დღეს ეს დახურული საქმეა.

მუქარა მუდმივად არის. შესაძლოა, სხვა რამ იპოვონ, მაგრამ კითხვაც არ უნდა იმას, რომ მე არ შევწყვეტ მოგზაურობას“.

8 ნოემბერს ევროკომისიამ რეკომენდაცია გასცა საქართველოს ევროკავშირის წევრობის კანდიდატის სტატუსი მიენიჭოს, თუმცა ზოგიერთი რეფორმის განხორციელების პირობით. ევროკომისიის მიერ განსაზღვრული პირობებიდან ერთ-ერთი დეოლიგარქიზაციის შესახებ არსებული სამოქმედო გეგმის გაუმჯობესებაა ვენეციის კომისიის რეკომენდაციების შესაბამისად, ოპოზიციური პარტიებისა და სამოქალაქო საზოგადოების ჩართულობით.