გახარიას პარტია: ამ ეტაპზე კოალიცია „ძლიერ საქართველოსთან“ შეთანხმება ვერ მოხერხდა

„ჩვენ გვერდზე გადავდეთ ჩვენი პარტიული ინტერესები და ყველაფერი დავთმეთ, სანაცვლოდ მეორე მხარემ ითხოვა ვადა შიდა კოალიციური შეთანხმებისთვის. ჩვენდა სამწუხაროდ, როგორც ჩანს, მეორე მხარემ შიდა კონსესუსს ვერ მიაღწია. საარჩევნო დრო კონკრეტული გადაწყვეტილებების მისაღებად უკვე შეზღუდულია. შესაბამისად, ამ ეტაპზე შეთანხმების მიღწევა ვერ მოხერხდა.

ჩვენსა და „ლელოს“ შორის დაწყებული დისკუსია გვიჩენს პოზიტიურ მოლოდინებს, მომდევნო მოწვევის პარლამენტში თანაშრომლობასთან დაკავშირებით“, - ნათქვამია პარტიის მიერ გავრცელებულ განცხადებაში.

„საქართველოსთვის“ მადლობას უხდის პრეზიდენტ სალომე ზურაბიშვილს, რომელსაც, პარტიის განცხადებით, მნიშვნელოვანი როლი აქვს დღეს ქვეყანაში მიმდინარე პოლიტიკურ პროცესებში.

„სწორედ მისი ინიციატივითა და მოწვევით ვიყავით ჩართული ამ რამდენიმე დღის განმავლობაში მიმდინარე პოლიტიკურ დისკუსიაში. ასევე, მადლობას ვუხდით „ლელოს” დისკუსიაში მონაწილეობისთვის“, - აღნიშნულია განცხადებაში.

პრეზიდენტის ადმინისტრაციაში გიორგი გახარიასა და მამუკა ხაზარაძის მორიგი შეხვედრა დღეს იყო მოსალოდნელი. რამდენიმე საათის წინ ხაზარაძემ თქვა, რომ მის კოალიციაში პოზიციები თითქმის შეჯერებული იყო.

„ეს პროცესი დაიწყო, მიმდინარეობდა და ჯერ კიდევ მიმდინარეობს პრეზიდენტის აქტიური მონაწილეობით. სიმართლე გითხრათ, ჩემთვის სრული სიურპრიზი აღმოჩნდა ეს განცხადება, რადგან გუშინდელი დღის მონაცემებით, ჩვენ გვქონდა პრინციპულ საკითხებზე ერთგვარი შეთანხმება, არსებობდა ორივე მხრიდან ძალიან გასაგები მოლოდინები. ამ მოლაპარაკების წარმატებით დასრულებას და გახარიას გუნდთან შეთანხმების მიღწევას აქვს სრული მხარდაჭერა „ლელოს“ შიგნით“, - განაცხადა საბა ბუაძემ ტელეკომპანია „პირველის“ ეთერში.

ბუაძის თქმით, კოალიციის შიგნით ამ საკითხზე პრინციპული წინააღმდეგობა არავის აქვს.

ამ თემაზე:

„დღეს მოვდიოდი ხელმოსაწერად“ - ხაზარაძის პასუხი გახარიას პარტიის განცხადებაზე