განათლების, მეცნიერებისა და ახალგაზრდობის მინისტრად ალექსანდრე წულაძე დაინიშნა

„მოხარული ვარ, რომ ის დღეიდან საქმიანობას გააგრძელებს მინისტრის პოზიციაზე. ბატონი ალექსანდრე არის ძალიან კვალიფიციური, ერუდირებული, გამოცდილი ადამიანი და შესაბამისად, პირადად მე და გუნდმა მივიჩნიეთ, რომ ის იქნებოდა საუკეთესო კანდიდატი ამ თანამდებობისთვის“, - განაცხადა კობახიძემ დღევანდელ ბრიფინგზე.

თავად ახლად დანიშნულმა მინისტრმა მოკლე კომენტარი გააკეთა და თქვა, რომ გააგრძელებს მისი წინამორბედის მიერ დაწყებულ რეფორმებს. „განათლება ქმნის ქვეყნის მომავალს და მე მჯერა, რომ ჩვენი თავდადებით, შრომით და პასუხისმგებლობით, ასევე სწორი სვლით შევძლებთ უზრუნველვყოთ საქართველოს უკეთესი მომავალი“, - განაცხადა წულაძემ.

აღსანიშნავია, რომ სწორედ მაშინ, როდესაც განათლების ხარისხის განვითარების ეროვნულ ცენტრს ალექსანდრე წულაძე ხელმძღვანელობდა, უმაღლესი საგანმანათლებლო დაწესებულებების ავტორიზაციის საბჭომ ილიას სახელმწიფო უნივერსიტეტთან დაკავშირებული გადაწყვეტილება მიიღო და უმაღლეს სასწავლებელს ე.წ. პირობითი ავტორიზაცია მიანიჭა. უნივერსიტეტის ხელმძღვანელობა გადაწყვეტილებას არ ეთანხმება და მის გასაჩივრებას აპირებს.

განათლების, მეცნიერებისა და ახალგაზრდობის მინისტრის თანამდებობა მას შემდეგ გახდა ვაკანტური, რაც რამდენიმე დღის წინ გიორგი ამილახვარი გადადგა. როგორც ამილახვარმა განმარტა, ის კერძო სექტორში ბრუნდება და საქმიანობას ბიზნესში გააგრძელებს. გიორგი ამილახვარი მინისტრის თანამდებობაზე 2023 წლის მარტიდან მუშაობდა, მანამდე კი პარლამენტში „ქართული ოცნების“ დეპუტატი იყო.