მომიტინგეებისთვის სახის დაფარვის ასაკრძალად „ოცნება“ კანონს დაჩქარებული წესით მიიღებს

მთავრობის ადმინისტრაციაში ბრიფინგზე, ახალი კანონის დაანონსებამდე, კობახიძე ტელეკომპანია „პირველის“ გადამღებ ჯგუფზე ნიღბიანი პირების თავდასხმას გამოეხმაურა და მომხდარი შეაფასა პროვოკაციად, „რომლის ერთადერთი მიზანიც ვითარების ხელოვნურად დაძაბვა შეიძლება იყოს“.

„ამ დანაშაულის გამოძიება არის დაწყებული და დიდი იმედი მაქვს, რომ დამნაშავე რაც შეიძლება მალე გამოვლინდება. ... გამომდინარე იქიდან, რომ არის ძალიან ბევრი ნიღბიანი, შინაგან საქმეთა სამინისტრო უჭირს რეაგირება. ვეღარ ხდება უკვე იმის გარჩევა, ვინ არის მომიტინგე, ვინ არ არის მომიტინგე და ა.შ. ჩვენ მივიღებთ კანონს, რომლითაც აიკრძალება შეკრებაზე შეკრების მონაწილეების მიერ, მათ შორის, კონტრშეკრების მონაწილეების მიერ, სხვადასხვა საშუალებით სახის დაფარვა“, - თქვა კობახიძემ.

მისივე განცხადებით, ეს არის „ძალიან მნიშვნელოვანი კანონი, რომელიც ხელს შეუწყობს ძალადობის პრევენციას შეკრებების დროს“.

„ასეთი კანონები მოქმედებს ევროკავშირს წევრ არაერთ ქვეყანაში და ძალადობის პრევენციისთვის მნიშვნელოვანია ჩვენთანაც ასეთი კანონის მიღება. ტექნიკურად მოვახერხებთ ისე ყველაფერის ორგანიზებას, რომ უკვე მომავალი კვირის ბოლომდე იქნეს მიღებული შესაბამისი კანონი. ეს კანონი თვის ბოლომდე სრულად ამოქმედდება“,- განაცხადა არალეგიტიმურმა პრემიერმა.

7 დეკემბერს, თბილისში მიმდინარე პროევროპული აქციების მეათე დღეს, ტელეკომპანია „პირველის“ გადამღებ ჯგუფს ნიღბიანი პირები პირდაპირ ეთერში დაესხნენ თავს და ფიზიკურად გაუსწორდნენ. ეს იმ დროს მოხდა, როდესაც ჟურნალისტი მაკა ჩიხლაძე და ოპერატორი გიორგი შეწირული აქციაზე მიმავალ მოქალაქეებზე ე.წ. ტიტუშკების ძალადობას იღებდნენ. ტელეკომპანიის საინფორმაციო სამსახურის უფროსის, ნოდარ მელაძის განცხადებით, მას მიაწოდეს ინფორმაცია, რომ მოძალადე ნიღბიანები სამოქალაქო ფორმაში გადაცმული სპეცრაზმელები იყვნენ.

29 ნოემბერს ნიღბიანი სპეცრაზმელი ფიზიკურად გაუსწორდა „ფორმულას“ ჟურნალისტს, გურამ როგავას, რომელიც პირდაპირ ეთერში მუშაობდა.

სპეცრაზმელები და შავებში ჩაცმული ნიღბიანები აქციების განმავლობაში მოქალაქეებს სასტიკად სცემდნენ. მათი იდენტიფიცირება ფაქტობრივად შეუძლებელია.