აჭარის განათლების, კულტურისა და სპორტის სამინისტროს კულტურის დეპარტამენტის უფროსის, თამარ გუდავას 20 წლის შვილი განსაკუთრებით დიდი ოდენობით ნარკოტიკული საშუალების ჯგუფურად გასაღების მცდელობის ბრალდებით დააკავეს. სასამართლომ ბრალდებულს აღკვეთის ღონისძიების სახით პატიმრობა უკვე შეუფარდა.
ახალი ამბები
მკითხველის რჩეული
- 1 ეს არის ღალატი, ამ კანონით ეს ქვეყანა თქვენ მიგყავთ რუსეთისკენ - ეთერ თურაძე შალვა პაპუაშვილს
- 2 სტიგმატიზება საბედისწერო შეიძლება იყოს ადამიანების სიცოცხლისთვის - ზენონი რუსულ კანონზე
- 3 ფიცს ვდებ, თუ კანონს არ გაიწვევენ, დავტოვებ პარტიას და თანამდებობას - „ოცნების“ წევრი თელავიდან
- 4 83 დეპუტატი, რომელმაც რუსულ კანონს მხარი დაუჭირა | სია
- 5 ბიძინა ივანიშვილის ანტიდასავლური გზავნილები
- 6 მთავრობამ 7, 8 და 10 მაისი უქმე დღეებად გამოაცხადა
მაღალჩინოსნის შვილის დაკავების შესახებ ინფორმაცია თავდაპირველად ტელეკომპანია „მთავარმა არხმა“ გაავრცლა, რის შემდეგაც Facebook-ის პირად გვერდზე განცხადება თამარ გუდავამაც გამოაქვეყნა.
„მეც ახლა ვარკვევ სიტუაციას. მინდა იცოდეთ, რომ თუ დადასტურდა ინფორმაცია ჩემი უფროსი შვილის რაიმე სახის ბრალეულობაზე, ის აუცილებლად აგებს მკაცრად პასუხს კანონის წინაშე“, - წერს თამარ გუდავა და აღნიშნავს, რომ „ყველანაირი უხერხულობის თავიდან ასაცილებლად“ თანამდებობა დატოვა.
დასავლეთ საქართველოს საოლქო პროკურორის მოადგილის, ემზარ გაგნიძის განცხადებით, 1-ელ მარტს, ორმა პირმა, შემდგომში გასაღების მიზნით, პოლიეთილენის პაკეტებში დაფასოებული დიდი ოდენობით ნარკოტიკული საშუალება მეთადონი (ფუძე) სამტრედიის მუნიციპალიტეტის ერთ-ერთ სოფელში მიიტანა და მდინარის პირას ე.წ. „ლოკაციებზე“ განათავსა.
„მათ ტელეფონის ფოტოკამერით, ადგილმდებარეობის კოორდინატების მითითებით, თითოეულ ლოკაციას ფოტოსურათი გადაუღეს, რათა შემდგომში ისინი ნარკოტიკული საშუალებების შემძენი პირებისთვის გადაეგზავნათ. გამოძიების მიერ ამ დროისთვის მოპოვებული ინფორმაციით, აღნიშნულის შემდგომ ორივე პირმა მოიხმარა ნარკოტიკული საშუალება, რის შემდგომაც ერთ-ერთი მათგანი სავარაუდოდ ნარკოტიკების ზედოზირებით გარდაიცვალა. 3 მარტს, შსს-ს თანამშრომლებმა ე.წ. „ლოკაციებიდან“ ბრალდებულების მიერ 24 ცალად დაფასოებული და განთავსებული განსაკუთრებით დიდი ოდენობის - 3,35 გრამი ნარკოტიკული საშუალება ამოიღეს“, - განაცხადა ემზარ გაგნიძემ.
საქმის პროკურორი განმარტავს, რომ გარდაცვლილი პირის სიკვდილის მიზეზის დასადგენად სამედიცინო ექსპერტიზა ჩატარდება.
„მთავარი არხის“ ინფორმაციით, გარდაცვლილია თერჯოლის მუნიციპალიტეტის ერთ-ერთ სოფელში მცხოვრები ახალგაზრდა მამაკაცი, რომელიც ღამით სახლში მივიდა, დაიძინა, დილით კი ოჯახის წევრებმა გარდაცვლილი ნახეს.
საქმეზე გამოძიება განსაკუთრებით დიდი ოდენობით ნარკოტიკული საშუალების ჯგუფურად გასაღების მცდელობის ფაქტზე მიმდინარეობს. ბრალის დამტკიცების შემთხვევაში, დაკავებულს 14-დან 20 წლამდე ან უვადო თავისუფლების აღკვეთა ემუქრება.
