„სოფელ კირბალთან მომხდარი კიდევ ერთხელ ადასტურებს ადგილზე არსებულ რთულ უსაფრთხოების გარემოს და მეტყველებს ოკუპაციის მძიმე შედეგებზე, რომელთანაც გამკლავება საქართველოს ხელისუფლებასთან ერთად, სამწუხაროდ, მშვიდობიან მოქალაქეებსაც უწევთ“, - ასე გამოეხმაურა საქართველოს პრემიერ-მინისტრი ირაკლი ღარიბაშვილი დღეს, 6 ნოემბერს, გორის რაიონის სოფელ კირბალში რუსი სამხედროების მიერ ადგილობრივი მცხოვრების თამაზ გინტურის მკვლელობას. ღარიბაშვილის წერილობითი განცხადება მთავრობის ადმინისტრაციამ გაავრცელა.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
„ვუსამძიმრებ გარდაცვლილის ოჯახის წევრებსა და ახლობლებს ამ უმძიმეს ტრაგედიას. სახელმწიფო მათ გვერდით დგას ამ მძიმე წუთებში.
გორის მუნიციპალიტეტის სოფელ კირბალთან რუსეთის მიერ ოკუპირებულ ტერიტორიაზე უმძიმესი ფაქტი მოხდა - უკანონოდ დაკავების მცდელობისას რუსეთის საოკუპაციო ძალის წარმომადგენლის მიერ ცეცხლსასროლი იარაღით სროლის შედეგად მოკლულ იქნა საქართველოს მოქალაქე.
აღნიშნულ ინციდენტთან დაკავშირებით ამოქმედებულია ყველა შესაბამისი მექანიზმი, ინფორმირებულები არიან საერთაშორისო პარტნიორები. მიმდინარეობს აქტიური მუშაობა საოკუპაციო ძალების მხრიდან უკანონოდ დაკავებული საქართველოს კიდევ ერთი მოქალაქის უმოკლეს ვადებში გასათავისუფლებლად.
მოვუწოდებთ საერთაშორისო თანამეგობრობას შესაბამისი შეფასება და რეაგირება მოახდინოს მომხდარზე, ასევე, საოკუპაციო რეჟიმის წარმომადგენლებს ითანამშრომლონ ყველა მხარესთან დამნაშავის გამოსავლენად და დასასჯელად“, - აღნიშნავს პრემიერი.
ადგილობრივების ინფორმაციით, მკვლელობა ლომისის წმინდა გიორგის ეკლესიასთან მოხდა. ეს სწორედ ის ტაძარია, რომლის კარიც საოკუპაციო ძალების წარმომადგენლებმა, ცოტა ხნის წინ, თუნუქის ფირფიტით აჭედეს.
სოფელი კირბალი ქალაქ გორიდან 30 კილომეტრშია და 500-მდე ადამიანი ცხოვრობს. რუსეთ-საქართველოს 2008 წლის აგვისტოს ომის შემდეგ, საოკუპაციო ხაზს იქით აღმოჩნდა სოფლის სასაფლაო და ასობით ჰექტარი მიწა. კირბალი გორის მუნიციპალიტეტში საოკუპაციო ხაზთან მდებარე სოფლებიდან ყველაზე სახიფათოდ მიიჩნევა. სოფელში თითქმის ოჯახი არ არის დარჩენილი, რომლის ერთი წევრი მაინც რუს სამხედროებს არ ჰყავდეთ დაკავებული და ცხინვალის იზოლატორში გადაყვანილი. რუსი სამხედროები ადგილობრივ მცხოვრებლებს მაშინ აკავებენ, როცა ისინი საქონელს მწყემსავენ, ტყეში შეშის მოსატანად მიდიან ან ეკლესიაში სალოცავად.
