პარლამენტის თავმჯდომარის, შალვა პაპუაშვილის განცხადებით, მიუნხენის უსაფრთხოების კონფერენციაზე საქართველო მაღალ დონეზე, საგარეო საქმეთა მინისტრის სახით წარდგება, ხოლო პრეზიდენტი სალომე ზურაბიშვილი ღონისძიებაზე „კერძო პირი“ იქნება.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 აქციებზე ჟურნალისტებისთვის მუშაობაში უკანონოდ ხელის შეშლის ფაქტებზე გამოძიება დაიწყო
- 5 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 6 ბჟანიას ქართველი დეპუტატები აფხაზეთში ფარულად ჩამოჰყავდა - არძინბა
„ის მიუნხენში წარმოადგენს მხოლოდ საკუთარ თავს, ის არ წარმოადგენს საქართველოს. ეს არის კერძო პირის ყოფნა იქ და კიდევ ერთხელ აჩვენებს, რომ მას არ აინტერესებს საქართველოს კონსტიტუცია, ქართველი ხალხი. მას საქართველო ჰგონია საკუთარი რეზიდენციის უკანა ეზო, სადაც როგორც უნდა, ისე მოიქცევა“, - განაცხადა პაპუაშვილმა.
პარლამენტის თავმჯდომარემ პრეზიდენტი რადიკალიზაციასა და ქვეყნის დისკრედიტაციაში დაადანაშაულა. მისი თქმით, მიუნხენში მთავრობის ნებართვის გარეშე გამგზავრება ამის ერთ-ერთი მაგალითია.
„ამას ერთადერთი მიზანი აქვს, რომ საქართველოს საერთაშორისო რეპუტაცია შეირყეს. ის ძალიან ბეჯითად მიჰყვება „ნაციონალური მოძრაობის“ და მათი მფარველების მიერ დასახულ ხაზს“, - თქვა შალვა პაპუაშვილმა პრეზიდენტის შესახებ.
მიუნხენის უსაფრთხოების კონფერენცია, რომელიც მსოფლიოს წამყვანი ფორუმია, 16-18 თებერვალს გაიმართება. ღონისძიების დაწყებამდე კონფერენციის ანგარიში გამოქვეყნდა, სადაც საქართველოს ყოფილი პრემიერ-მინისტრი, მმართველი პარტია „ქართული ოცნების“ საპატიო თავმჯდომარე ბიძინა ივანიშვილი „პრორუს ოლიგარქად“ არის მოხსენიებული და აღნიშნულია, რომ ის არის პასუხისმგებელი საქართველოს დემოკრატიულ უკუსვლაზე.
კონფერენციას საქართველოს საგარეო საქმეთა მინისტრი, ილია დარჩიაშვილი დაესწრება. გარდა ამისა, კონფერენციაში მონაწილეობის მიღებას აპირებს სალომე ზურაბიშვილიც, რომელიც, მისი ადმინისტრაციის ინფორმაციით, იქ ოფიციალურად მიიწვიეს.
2023 წელს, მიუნხენის უსაფრთხოების კონფერენციას საქართველოდან დელეგაცია დაესწრო, რომელსაც მაშინდელი პრემიერ-მინისტრი ირაკლი ღარიბაშვილი ხელმძღვანელობდა. დელეგაციის შემადგენლობაში იყვნენ საგარეო საქმეთა მინისტრი ილია დარჩიაშვილი, თავდაცვის მინისტრი ჯუანშერ ბურჭულაძე და მთავრობის ადმინისტრაციის ხელმძღვანელი რევაზ ჯაველიძე.
