საქართველოს ვიცე-პრემიერმა, კულტურისა და სპორტის მინისტრმა თეა წულუკიანმა „მორიგი შეცდომა“ უწოდა „ქართული ოცნების“ წევრებისთვის სავიზო სანქციების დაწესებაზე ამერიკის შეერთებული შტატების გადაწყვეტილებას.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
„შეიძლება თამამად ითქვას, რომ ეს არის მორიგი შეცდომა, რომელსაც, მათდა სამწუხაროდ და ჩვენდა სამწუხაროდ, ამერიკის შეერთებული შტატები უშვებს თავის სტრატეგიულ პარტნიორთან ურთიერთობაში. ეს არ არის პირველი შეცდომა და ალბათ, აქედანვე უნდა ვივარაუდოთ, რომ სხვა შეცდომებიც იქნება დაშვებული. იმედი გვაქვს, რომ არა, მაგრამ დინამიკა მე პირადად ამას მავარაუდებინებს“, - განაცხადა წულუკიანმა ტელეკომპანია „იმედის“ ეთერში.
მისი თქმით, აშშ-ის ეს გადაწყვეტილება კიდევ უფრო გაახანგრძალივებს დროს იმ დღის დადგომამდე, როცა ორ ქვეყანას შორის ურთიერთობების გადატვირთვა დაიწყება.
„ამიტომ არის შეცდომა. რა თქმა უნდა, პირველ რიგში, ამერიკის შეერთებულ შტატებს სჭირდება, რომ ეს ურთიერთობები გადაიტვირთოს. ჩვენ დაველოდებით ამ დღეს, რადგან ჩვენი სტრატეგიული პარტნიორობის ერთგულები ვიყავით და ვართ. არასდროს გვითქვამს ამერიკის შეერთებულ შტატებზე და მათთან მეგობრობაზე უარი. რეალურად, ეს მთავრობაა ვიღაცისთვის პრობლემა. ამ მთავრობას, რომლის წევრიც ვარ განუწყვეტელი 12 წლის განმავლობაში, არასდროს, არცერთხელ, არცერთ დარგსა და სფეროში არ გადაუდგამს სტრატეგიული პარტნიორობის საწინააღმდეგო ნაბიჯი. მოთმინებით დაველოდებით იმ დღეს, როდესაც ჩვენი მეგობარი გადაწყვეტს, რომ კვლავ მეგობრულად დაგველაპარაკოს, უარი თქვას რევოლუციების მოწყობის დაფინანსებაზე“, - აღნიშნა თეა წულუკიანმა.
წულუკიანი ფიქრობს, რომ აშშ-ის სანქციების მიზანი ხელისუფლებასა და ხალხს შორის უფსკრულის შექმნა ან/და გაღრმავებაა.
აშშ-ის სახელმწიფო დეპარტამენტმა საქართველოს პარლამენტის მიერ ე.წ. „უცხოეთის აგენტების“ შესახებ რუსული კანონის დამტკიცების, ასევე, კანონის მოწინააღმდეგეების მიმართ ძალადობისა და დაშინების კამპანიის გამო, სავიზო შეზღუდვის ახალი პოლიტიკა შემოიღო, 6 ივნისს კი, ამ პოლიტიკის ფარგლებში საქართველოს ათობით მოქალაქე დაასანქცირა. სავიზო სანქციების პირველი ნაწილი დაახლოებით 30 ადამიანს შეეხო. მათ შორის არიან „ქართული ოცნების“ წევრები, პარლამენტის დეპუტატები, სამართალდამცავი ორგანოების თანამშრომლები და კერძო პირები. დასანქცირებულთა სახელები საჯაროდ არ დასახელებულა.
აშშ მზად არის დამატებითი სანქციების დასაწესებლად. სახელმწიფო დეპარტამენტის პრეს-სპიკერმა, მეთიუ მილერმა განაცხადა, რომ საქართველოს მთავრობას ჯერ კიდევ აქვს დრო, სიტუაციის შემობრუნებისთვის.
