ԱՄՆ դեսպանությունը պարզաբանել է Իրակլի Կոբախիձեի հրավերը չեղարկելու պատճառները

«Բայդենի վարչակազմը չեղարկել է վարչապետ Կոբախիձեի հրավերը ՄԱԿ-ի Գլխավոր ասամբլեայի տարեկան ընդունելությանը և հրաժարվել է հանդիպել Վրաստանի պատվիրակության հետ՝ Վրաստանի կառավարության հակաժողովրդավարական գործողությունների, ապատեղեկատվության և ԱՄՆ-ի և Արևմուտքի նկատմամբ բացասական հռետորաբանության պատճառով»,- հայտնել են ԱՄՆ դեսպանությունից։

Վրաստանի վարչապետն այսօր պետք է մասնակցեր ԱՄՆ նախագահ Ջո Բայդենի և նրա կնոջ՝ Ջիլ Բայդենի անունից Նյու Յորքում կայանալիք պաշտոնական ընդունելությանը՝ ի պատիվ Գլխավոր ասամբլեայի 79-րդ նստաշրջանին մասնակցող պատվիրակությունների ղեկավարների։ Սակայն, Բայդենի վարչակազմը չեղարկել է Իրակլի Կոբախիձեի հրավերը։

Ինչպես հաղորդում է «Ամերիկայի Ձայնը», վարչակազմը հրաժարվել է վրացական պատվիրակության հետ բոլոր հանդիպումներից, այդ թվում՝ Սպիտակ տան ազգային անվտանգության հարցերով խորհրդական Ջեյք Սալիվանը նույնպես հրաժարվել է հանդիպել վարչապետ Կոբախիձեի հետ։ «Ամերիկայի Ձայնի» փոխանցմամբ՝ այս որոշումների պատճառը Վրաստանի կառավարության հակաժողովրդավարական վարքագիծն է և մի շարք քայլերը, այդ թվում՝ այսպես կոչված օտարերկրյա գործակալների մասին օրենքի ընդունումը, Հակակոռուպցիոն բյուրոյի քայլը ոչ կառավարական կազմակերպությունների՝ «Թրանսփարենսի Ինթերնեշնլ-Վրաստանի» և «Ընտրիր Եվրոպայի» դեմ, ինչպես նաև իշխող ուժի հայտարարությունները ընդդիմադիր կուսակցությունների արգելման մասին։

Իրակլի Կոբախիձեն ԱՄՆ է մեկնել սեպտեմբերի 22-ին։ Այս այցին նախորդել էր ԱՄՆ-ի կողմից «Վրացական երազանքի» պատվավոր նախագահ Բիձինա Իվանիշվիլիի սպասվող պատժամիջոցների մասին տեղեկատվության տարածումը։

Մեկ շաբաթ առաջ՝ սեպտեմբերի 16-ին, ԱՄՆ գանձապետարանը ֆինանսական պատժամիջոցներ է սահմանել Վրաստանի ՆԳՆ հատուկ հանձնարարությունների դեպարտամենտի տնօրեն Զվիադ Խարազիշվիլիի, նույն ինքը՝ «Խարեբայի» և նրա տեղակալներից մեկի՝ Միլեր Լագազաուրիի նկատմամբ։ Պատժամիջոցների հիմքում ընկած է նրանց մասնակցությունը մարդու իրավունքների լուրջ խախտումներին ռուսական օրենքի դեմ խաղաղ ցույցերի բռնի ճնշման ժամանակ։ Ֆինանսական պատժամիջոցների են ենթարկվել նաև խաղաղ ցույցերի վրա հարձակումների կազմակերպիչները՝ «Ալտ-Ինֆո»-ի առաջնորդներ Կոնստանտին Մորգոշիան և Զուրաբ Մախարաձեն։ Բացի այդ, Պետդեպարտամենտը հայտարարել է, որ վիզային սահմանափակումներ է մտցրել Վրաստանի ավելի քան 60 քաղաքացիների և նրանց ընտանիքների անդամների նկատմամբ, ովքեր պատասխանատու են կամ մասնակից են Վրաստանում ժողովրդավարության խաթարմանը։