ԵՄ-ում սատարել են վրացական դիվանագիտական ​​անձնագրերի համար առանց վիզայի ռեժիմի կասեցմանը․ Յոզվյակ

«ԵՄ դեսպաններն այսօր առավոտյան կանաչ լույս են վառել վրացական դիվանագիտական ​​անձնագրերի համար վիզային ռեժիմի ազատականացումը կասեցնելու համար։ Արտգործնախարարները դա կհաստատեն երկուշաբթի օրը։ Հունգարիան և Սլովակիան դեմ են քվեարկելու, բայց դա նշանակություն չունի, քանի որ այնտեղ կա որակյալ մեծամասնություն»,- գրել է Յոզվյակը X հարթակում։

Արտաքին հարաբերությունների խորհրդի նիստը նախատեսված է երկուշաբթի՝ հունվարի 27-ին, ժամը 10:00-ին Բրյուսելում։ Խորհուրդը նախագահելու է Եվրամիության արտաքին գործերի և անվտանգության քաղաքականության բարձր ներկայացուցիչ Կայա Կալասը։ Օրակարգի համաձայն՝ 27 երկրների արտգործնախարարները նախատեսում են անդրադառնալ նաև Վրաստանում տեղի ունեցող իրադարձություններին։

Դեկտեմբերի 17-ին Արտաքին հարաբերությունների խորհրդի նիստից հետո Կալասն ասել է, որ նախարարները համաձայնել են «դիվանագիտական ​​անձնագրեր ունեցողների համար առանց վիզայի ռեժիմը կասեցնելու անհրաժեշտության շուրջ»։ Դեկտեմբերի 20-ին Եվրահանձնաժողովն այս առաջարկն ուղղել է Եվրոպական խորհրդին։ Հանձնաժողովի հայտարարության մեջ ասվում է, որ սա պատասխան է Վրաստանի իշխանությունների կողմից նոյեմբերի 28-ից խաղաղ ցուցարարների, քաղաքական գործիչների և անկախ ԶԼՄ-ների նկատմամբ իրականացվող դաժան բռնաճնշումներին։

Վրաստանի օրենսդրության համաձայն՝ դիվանագիտական ​​անձնագիր ունեցող անձանց թվում են (ոչ ամբողջական ցանկ)՝

• Նախագահը և նրա կինը/ամուսինը,

• Խորհրդարանի նախագահը և նրա կինը/ամուսինը,

• Վարչապետն ու նրա կինը/ամուսինը,

• Խորհրդարանի անդամները,

• Գերագույն դատարանի նախագահը և անդամները,

• Սահմանադրական դատարանի նախագահը և անդամները,

• Վերաքննիչ դատարանների նախագահները,

• Վրաստանի Ազգային բանկի նախագահը,

• Ազգային անվտանգության խորհրդի աշխատակազմի ղեկավարը և նրա տեղակալը,

• Վրաստանի արտաքին գործերի նախարարը և նրա կինը/ամուսինը,

• Նախարարները և պետնախարարները, նրանց առաջին տեղակալները և տեղակալները,

• Պետական ​​անվտանգության ծառայության պետը, նրա առաջին տեղակալը և տեղակալները,

• Գլխավոր դատախազը,

• Հանրային պաշտպանը,

• Անձնական տվյալների պաշտպանության ծառայության ղեկավարը,

• Հատուկ քննչական ծառայության պետը,

• Գլխավոր աուդիտորը,

• Ֆինանսների նախարարության քննչական ծառայության պետը,

• Արտակարգ իրավիճակների կառավարման ծառայության պետը,

• Խորհրդարանի աշխատակազմի ղեկավարը և նրա տեղակալները, 

• Խորհրդարանի աշխատակազմի միջազգային կապերի վարչության պետը, արտաքին հարաբերությունների, պաշտպանության և անվտանգության, եվրոպական ինտեգրման հարցերի խորհրդարանական հանձնաժողովների աշխատակազմի ղեկավարները, կառավարության կաբինետի ղեկավարը: Խորհրդարանի նախագահը և նրա տեղակալը,Արդարադատության բարձրագույն խորհրդի քարտուղարը և անդամները,

• Կենտրոնական ընտրական հանձնաժողովի նախագահը,

• Համայն Վրաստանի Կաթողիկոս-Պատրիարքը,

• Զինված ուժերի գլխավոր շտաբի պետը,

• Պաշտպանության ուժերի հրամանատարը,

• Ինքնավար Հանրապետությունների կառավարությունների նախագահները, Ինքնավար Հանրապետությունների Գերագույն խորհուրդների նախագահները և Գերագույն խորհուրդների անդամները,

• Պետական ​​պաշտպանության հատուկ ծառայության պետը,

• Հետախուզական ծառայության պետը,

• Պետական ​​լիազորները,

• Թբիլիսիի քաղաքապետը,

• Թբիլիսիի քաղաքային խորհրդի նախագահը, 

• Վրաստանի ներկայացուցիչները օտարերկրյա պետություններում կամ միջազգային կազմակերպություններում։