«Երազանքի» պատգամավոր Ռովշան Իսկանդարովը ձերբակալվել է ընտրակեղծիքների մեղադրանքով

«Հետաքննությունը պարզել է, որ 2024 թվականի հոկտեմբերի 26-ին Վրաստանի խորհրդարանի ընտրությունների ժամանակ Մառնեուլիի մունիցիպալիտետի Սադախլո գյուղի թիվ 69 ընտրատեղամասում մեղադրյալները օրենքի խախտմամբ քվեաթերթիկներ են տեղադրել արկղում։ Ձեռնարկված քննչական գործողությունների արդյունքում իրավապահ մարմինները որպես մեղադրյալ ձերբակալել են Ռ.Ի.-ին և Է․Ի․-ին»,- ասված է ՆԳՆ հաղորդագրության մեջ։

Գործը քննվում է ՔՕ 164-րդ հոդվածով, որը վերաբերում է ընտրությունների հետ կապված փաստաթղթերի՝ ընտրացուցակների, արձանագրությունների, քվեաթերթիկների, հաշվառման մատյանների և վերահսկիչ թերթերի դիտավորությամբ կեղծելուն։ Հանցագործությունը պատժվում է ազատազրկմամբ՝ առավելագույնը 2 տարի ժամկետով։

Հոկտեմբերի 26-ին՝ խորհրդարանական ընտրությունների օրը, սոցիալական ցանցերում շրջանառվել է Մառնեուլիի 69-րդ ընտրատեղամասում դիտորդի կողմից նկարահանված տեսանյութ, որտեղ երևում է, որ Ռովշան Իսկանդարովը քվեաթերթիկներ է լցնում արկղը։ Տեսանյութում երևում է նաև մեկ այլ տղամարդ, ով օգնում է նրան։ Ռովշան Իսկանդարովն այնտեղ էր որպես «Վրացական երազանքի» ներկայացուցիչ։

Միջադեպի պատճառով թիվ 69 ընտրատեղամասի տվյալները անվավեր է ճանաչվել։ «Միասնություն-Ազգային շարժումից» ասել են, որ ընդդիմությունը նշված տեղամասում ընտրություններում հաղթել է մեծ տարբերությամբ, որտեղ միասնական ցուցակում 1643 ընտրող կար։

Իշխող կուսակցության գործադիր քարտուղար Մամուկա Մդինարաձեն քվեաթերթիկների լցոնումը «բեմադրված ներկայացում» և «սադրանք» է անվանել։ Նա չի բացառել, որ Իսկանդարովին կաշառել է ընդդիմությունը։ Ինքը՝ մեղադրյալը, իր գործողությունները բացատրել է որպես «ընդդիմության սադրանք» և ասել, որ իր նպատակը ընտրությունները կեղծելը չէր։