ԵԱՀԿ/Ժողովրդավարական հաստատությունների և մարդու իրավունքների գրասենյակը (ԵԱՀԿ/ԺՀՄԻԳ) արտահերթ եզրակացություն է հրապարակել խորհրդարանի կողմից ընդունված «օտարերկրյա գործակալների» մասին ռուսական օրենքի վերաբերյալ։ Եզրակացության մեջ նշվում է, որ «օրենքը պարունակում է լուրջ թերություններ», ինչի պատճառով այն անհամատեղելի է մարդու իրավունքների միջազգային չափանիշների և Վրաստանի՝ որպես ԵԱՀԿ անդամ երկրի պարտավորությունների հետ։ ԵԱՀԿ/ԺՀՄԻԳ-ը կարծում է, որ օրենքը պետք է չեղարկվի։
Լրահոս
Ընթերցողի ընտրանի
- 1 Ռուսաստանից ավելացած ներմուծումն ու թափված կարտոֆիլի բլրակները Ջավախքում
- 2 Տագնապի ազդանշան Դարիալում․ անցակետի բոլոր աշխատակիցները տարհանվել են
- 3 Հուլիսից ուսուցիչների աշխատավարձը կբարձրանա
- 4 Վրաց ժողովուրդը պայքարում է եվրոպական ապագայի համար, նա չպետք է պատժվի. Զուրաբիշվիլի
- 5 Գազային զենք ձեռք բերելու համար անհրաժեշտ կլինի ՆԳ նախարարության համաձայնությունը
- 6 ԱՄՆ-ը կարող է վերանայել Վրաստանին տրամադրվող ֆինանսական օգնության չափը
Այսօր հրապարակված իրավական վերլուծության մեջ ասվում է, որ օրենքը, որը քաղաքացիական հասարակությունը և լրատվամիջոցները սահմանում է որպես «կազմակերպություններ, որոնք հետապնդում են օտար ուժի շահեր»՝ բացառապես օտարերկրյա ֆինանսավորում ստանալու պատճառով, չի համապատասխանում մարդու իրավունքների միջազգային օրենսդրությամբ սահմանված խիստ պահանջներին:
ԵԱՀԿ/ԺՀՄԻԳ-ը նաև ընդգծում է, որ, օրինակ, Միացյալ Նահանգների օտարերկրյա գործակալների գրանցման ակտը (FARA) կամ Ավստրալիայի արտաքին ազդեցության թափանցիկության սխեմայի ակտը էապես տարբերվում են Վրաստանում ընդունված օրենքից՝ «շատ տարբեր են իրենց նպատակներով և շրջանակներով»:
«Թեև այս օրենքները կոչված են հրապարակայնորեն գրանցելու մասնավոր ընկերությունները կամ շահույթ չհետապնդող կազմակերպությունները, որոնք ուղղակիորեն զբաղվում են շահերի պաշտպանությամբ կամ լոբբինգով օտարերկրյա կառավարության անունից, նրանք չեն պիտակավորում յուրաքանչյուր քաղաքացիական հասարակության կազմակերպություն կամ լրատվամիջոց որպես օտարերկրյա ուժ ներկայացնող միայն այն պատճառով, որ նրանք ստանում են ֆինանսավորում դրսից»,- ասում է ԵԱՀԿ/ԺՀՄԻԳ-ը։
Եզրակացության մեջ նշվում է նաև, որ օրենքը հիմնված չէ քաղաքացիական հասարակության կազմակերպությունների վրա ռիսկերի կամ հնարավոր ազդեցության գնահատման վրա, և իշխանությունների կողմից օրենքը հիմնավորելու պատճառները տեղին չեն և չեն ապացուցում, թե ինչու են գոյություն ունեցող իրավական դաշտը և գրանցման/հաշվետվության պարտավորությունները անբավարար և/կամ անարդյունավետ:
ԵԱՀԿ/ԺՀՄԻԳ-ը Վրաստանի իշխանություններին կոչ է անում չեղարկել օրենքը և քայլեր ձեռնարկել երկրի օրենսդրությունը միջազգային չափանիշներին համապատասխանեցնելու համար։ Դա կարող է լինել լոբբիստական գործունեության կարգավորումը, քաղաքական կուսակցությունների և նախընտրական քարոզարշավների ֆինանսավորման կանոնների խստացումը, հակակոռուպցիոն կամ հակաահաբեկչական օրենքների ընդունումը, որոնք կնպաստեն հանրային որոշումների կայացման գործընթացի ավելի թափանցիկությանը:
«Չնայած կան մի շարք պարտավորություններ, որոնք կարող են դրվել քաղաքացիական հասարակության կազմակերպությունների վրա և արդարացված են մարդու իրավունքների տեսանկյունից, դրանք չպետք է հատուկ ուղղված լինեն քաղաքացիական հասարակության հատվածին կամ ենթադրեն, որ բոլոր քաղաքացիական հասարակության կազմակերպությունները, որոնք ստանում են օտարերկրյա ֆինանսավորում՝ ներկայացնում են օտար ուժի շահեր»,- ասում է ԵԱՀԿ/ԺՀՄԻԳ-ը։
Եվրախորհրդի Վենետիկի հանձնաժողովը նույնպես իրավական գնահատական է պատրաստել այսպես կոչված «օտարերկրյա գործակալների» մասին ռուսական օրենքի վերաբերյալ և Վրաստանի իշխանություններին խորհուրդ է տվել ետ կանչել օրենքը։ Վրաստանի իշխող կուսակցությունը, սակայն, հաշվի չի առել հանձնարարականը, քննադատել է Վենետիկի հանձնաժողովի մասնագիտական հիմնավորումը և հայտարարել, որ նրանց եզրակացությունը «գրել են տվել»։
