Լրահոս

«Մենք պետք է մեր ձևաչափը՝ Ղրիմի հարթակի ձևաչափը, ելակետ դարձնենք այլ հումանիտար և դիվանագիտական ​​հարթակների համար, որոնք կնպաստեն երբեմնի նվաճված տարածքների դեօկուպացիային՝ Մերձդնեստրից և Աբխազիայից մինչև հյուսիսային տարածքներ», - ասել է Զելենսկին։

Ուկրաինայի նախագահի խոսքով՝ ռուսական ագրեսիայի ներուժն ամբողջությամբ կկործանվի, երբ Ուկրաինայի դրոշը բարձրացվի իր արժանի տեղում՝ Ղրիմի քաղաքներում և գյուղերում. «Ղրիմի վերադարձը կլինի իրական խաղաղության վերականգնում։ Ղրիմը պետք է ազատվի Ռուսաստանի կողմից որպես պլացդարմ օգտագործվելուց: Այդ ժամանակ աշխարհը կզգա, որ այլևս կորուստներ չեն լինի, և մարդիկ կզգան, որ աշխարհն ավելի ապահով կդառնա»:

Ռուսաստանի կողմից օկուպացված Աբխազիայի դե ֆակտո արտգործնախարար Ինալ Արձինբան արձագանքել է Զելենսկու հայտարարությանը և նրան մեղադրել «բացահայտ սադրանքի» մեջ։ Ինչպես ասել է Արձինբան, իրենք Աբխազիայում «պատմական ընտրություն» են կատարել, և բացարձակապես անհեռանկարային է փորձել Աբխազիան ընդգրկել որևէ ձևաչափում, որը կենթադրի դե ֆակտո հանրապետության քաղաքական կարգավիճակի փոփոխություն։

«Աբխազիայի Հանրապետությունը հաստատակամորեն մտադիր է գնալ իր պետականության ամրապնդման և զարգացման ճանապարհով՝ չնայած դրսի բոլոր սադրանքներին», - ասել է դե ֆակտո արտաքին գործերի նախարարը։

Ղրիմի միջազգային հարթակի առաջին խորհրդարանական գագաթնաժողովը տեղի է ունենում Խորվաթիայում։ Դրան մասնակցում է նաև Վրաստանի խորհրդարանական պատվիրակությունը, որի կազմում են խորհրդարանի նախագահ Շալվա Պապուաշվիլին, փոխխոսնակ Արչիլ Թալակվաձեն և արտաքին հարաբերությունների հանձնաժողովի նախագահ Նիկոլոզ Սամխարաձեն։

Պապուաշվիլիի խոսքով, ինչպես Ուկրաինան, այնպես էլ վրաց ժողովուրդը տեսել է Ռուսաստանի անողոք ներխուժումը 2008-ին և 1990-ականների սկզբին: Նրա խոսքով, Վրաստանի փորձը տալիս է առնվազն երեք դաս, որոնցից մեկը միջազգային հանրության միասնության և համերաշխության պահպանման անհրաժեշտությունն է, քանի դեռ ամբողջությամբ չի վերականգնվել Ուկրաինայի և այլ երկրների տարածքային ամբողջականությունը, որը խախտել է Ռուսաստանը։

«Հակառակ դեպքում Ռուսաստանը չի դադարեցնի իր ռազմական արկածախնդրությունները իր հարևանությամբ և նրա սահմաններից դուրս... Մենք կանգնած ենք ուկրաինացի ժողովրդի կողքին, թեև Վրաստանն ինքնին էկզիստենցիալ վտանգի առաջ է, քանի որ մեր պատմական շրջանները վաղուց օկուպացված են Ռուսաստանի կողմից: Վրաստանի աջակցությունն Ուկրաինային անվերապահ է և մշտական»,- գրել է Շալվա Պապուաշվիլին Twitter-ում։

Այս թեմայով՝

Մենք ցուցադրելու ենք ուժ Վրաստանում, վրացիներին պետք է փրկենք. Արեստովիչ