Իռլանդիայի ապաստարաններում ապրող մարդկանց մեծ մասը Վրաստանի քաղաքացիներ են

Նման կացարաններում բնակվողների թվով առաջին տեղում վրացիներն են։ Նրանց հաջորդում են այնպիսի երկրների քաղաքացիներ, ինչպիսիք են՝ Նիգերիան (2 872 մարդ), Ալժիրը (2 612), Սոմալին (2 150), Զիմբաբվեն (1 963), Աֆղանստան (1 330), Հարավային Աֆրիկան (1 019), Պակիստանը (642), Ալբանիան (539), Բոտսվանան (520), Կոնգոն (408) և այլն։

Հուլիսի 16-ով թվագրված վերջին շաբաթական վիճակագրությունը հրապարակում է Միջազգային պաշտպանության և կարգավորման ծառայությունը (IPAS): Հենց այս գերատեսչությունն է պատասխանատու Իռլանդիայում միջազգային պաշտպանություն (ապաստան) հայցող մարդկանց կացարան և հարակից ծառայություններ տրամադրելու համար:

Հուլիսի 16-ի դրությամբ ապաստարաններում ապրել է Վրաստանի 3 473 քաղաքացի, հուլիսի 9-ին՝ 3 449, հուլիսի 2-ին՝ 3 432, հունիսի 25-ին՝ 3 394։

Պաշտոնական վիճակագրության համաձայն՝ ապաստան հայցողների ավելի քան մեկ երրորդն ապրում է Դուբլինի կացարաններում:

Տեղական լրատվամիջոցների (GRIPT) տվյալներով՝ 2022 թվականի համեմատ Վրաստանից ապաստանի դիմումների թիվը նվազել է։ Օրինակ՝ մայիսի վերջին ապաստան է խնդրել Վրաստանի 367 քաղաքացի, որով Վրաստանը երրորդ տեղում է Նիգերիայից և Ալժիրից հետո։ 2022 թվականի նույն ամսին ապաստան է խնդրել Վրաստանի 758 քաղաքացի, որին գերազանցել են միայն Սոմալիի քաղաքացիների դիմումները (759)։

«Միգուցե սա օպորտունիստական ​​և անօրինական ներգաղթի դեմ լայնածավալ բողոքի ցույցերի արդյունք է, ինչպես նաև այն, որ բոլոր կողմերի ավելի ու ավելի շատ ներկայացուցիչներ մտահոգություն են հայտնում դրա վերաբերյալ»,- ասվում է GRIPT հոդվածում։

2018 թվականից Իռլանդիան Վրաստանը ներառել է անվտանգ երկրների ցանկում։

2023 թվականի առաջին չորս ամիսների տվյալներով՝ ԵՄ երկրներում ապաստան է խնդրել Վրաստանի 9 586 քաղաքացի, ինչը 1731-ով ավելի է 2022 թվականի հունվար-ապրիլ ամիսների ցուցանիշից։