Կավելաշվիլին ետ է կանչել ռուսական օրենքը չեղարկելու վերաբերյալ Զուրաբիշվիլիի սահմանադրական հայցը

Կավելաշվիլիի աշխատակազմի տարածած հայտարարության մեջ ասվում է, որ «Օտարերկրյա ազդեցության թափանցիկության մասին» օրենքը «հիմնված է թափանցիկության և հաշվետվողականության վրա», ինչը նպաստում է «պետության ազգային ինքնիշխանության պաշտպանությանը և երկրի կայուն զարգացմանը»։

«Օրենքը ծառայում է հանրությանը օտար ուժերի շահերը պաշտպանող կազմակերպությունների ֆինանսավորման ծագման մասին հնարավորինս տեղեկացնելուն: Ըստ այդմ, Վրաստանի նախագահ Միխեիլ Կավելաշվիլին որոշել է հրաժարվել սահմանադրական հայցից»,- ասվում է հայտարարության մեջ:

Սալոմե Զուրաբիշվիլին հայց է ներկայացրել Սահմանադրական դատարան 2024 թվականի հուլիսին՝ համարելով, որ օրենքի մի շարք դրույթներ խախտում են Վրաստանի Սահմանադրությամբ երաշխավորված մի շարք հիմնարար իրավունքներ, և օրենքը, ընդհանուր առմամբ, հակասում է Սահմանադրության 78-րդ հոդվածին, ըստ որի սահմանադրական մարմինները պետք է ձեռնարկեն բոլոր միջոցները իրենց լիազորությունների շրջանակում՝ Եվրոպական միությանն ու ՆԱՏՕ-ին երկրի անդամակցությունն ապահովելու համար։

Հինգերորդ նախագահը պահանջել է կասեցնել ռուսական օրենքը և վերջնականապես չեղարկել այն։ Նույն պահանջներով Սահմանադրական դատարան է ներկայացվել ևս երեք հայց։

2024 թվականի հոկտեմբերին Սահմանադրական դատարանը բոլոր չորս սահմանադրական բողոքներն ըստ էության քննության է ընդունել մասնակի։ Միաժամանակ 6 դեմ, 2 կողմ ձայների հարաբերակցությամբ դատարանը չի կասեցրել ռուսական օրենքի գործողությունը։ Գիորգի Կվերենչխիլաձեն և Թեյմուրազ Տուգուշին այս հարցում տարբեր կարծիքներ են ունեցել։

Ռուսական օրենքը վիճարկվել է Մարդու իրավունքների եվրոպական դատարանում։