Լրահոս

«Սորոսը ինչքա՞ն է վճարել», «դու Սերգո Օրջոնիկիձեն ես։ Ինչո՞ւ պետք է ոտք դնես այս հողին», «դու ստրուկ ես, դու սովորական ստրուկ ես», «դու Սորոսի փողով վաճառված գործակալ ես», - լսվում է «Ռուսթավի 2» հեռուստաընկերության հեռարձակած կադրերում։ Իվանե Չխիկվաձեն նրանց չի պատասխանել և առանց մեկնաբանության լքել է օդանավակայանի տարածքը։

Հունիսի 4-ին Հելսինկյան հանձնաժողովի կողմից կազմակերպված ԱՄՆ Կոնգրեսում տեղի է ունեցել Վրաստանի ինքնիշխանության և ժողովրդավարության աջակցության վերաբերյալ լսումներ, որտեղ Իվանե Չխիկվաձեն և Եվրամիությունում Վրաստանի նախկին դեսպան, Chatham House-ի ավագ գիտաշխատող Նատալի Սաբանաձեն զեկույց են ներկայացրել։ Նրանք մանրամասն խոսել են ռուսական օրենքի նախաձեռնումից հետո Վրաստանում տեղի ունեցող զարգացումների, այդ թվում՝ ցույցերի մասնակիցների նկատմամբ բռնությունների և այլախոհների հետապնդումների մասին։

Իր ելույթում Իվանե Չխիկվաձեն ասել է, որ Վրաստանը գտնվում է խաչմերուկում՝ «կա՛մ կշարունակի ազատ և միացյալ Եվրոպայի մաս դառնալու իր ձգտումը, կա՛մ կրկին կդառնա Ռուսաստանի հետնաբակը»: Ինչպես նշել է նա, անհրաժեշտ են կոնկրետ քայլեր, որոնք կկանգնեցնեն կառավարությանը երկիրը տեղափոխել Ռուսաստանի ուղեծիր։ Նատալի Սաբանաձեն ասել է, որ «մեկ անպատասխանատու մարդու հրահանգով» խորհրդարանական մեծամասնությունը ոչնչացնում է Վրաստանի արտաքին քաղաքականության երկարաժամկետ առաջնահերթությունները, 30-ամյա ձեռքբերումներն ու բարեկամությունը՝ ընդունելով այնպիսի օրենքներ, ինչպիսին է այսպես կոչված «օտարերկրյա գործակալների» մասին ռուսական օրենքը։

Վրաստանի վարչապետը, խորհրդարանի նախագահը և «Վրացական երազանքի» առաջնորդները նույնպես Չխիկվաձեի և Սաբանաձեի նկատմամբ ատելության խոսք պարունակող և բռնություն խրախուսող հայտարարություններ են արել. նրանց մեղադրել են երկրին դավաճանելու մեջ և համեմատել բոլշևիկ Սերգո Օրջոնիկիձեի հետ։

«Այս մարդիկ՝ մերօրյա Սերգո Օրջոնիկիձեները, գնում են ոչ թե Մոսկվա, այլ Վաշինգտոն, որպեսզի ինչ-որ կերպ վնասեն մեր երկրին, ինչը, իհարկե, դավաճանություն է։ Միակ գնահատականը, որը կարելի է տալ, դա դավաճանությունն է... Երբ մարդը դավաճան է, նա քեզ հավասարապես կդավաճանի թե՛ Վաշինգտոնում, թե՛ Բրյուսելում, թե՛ Բեռլինում»,- ասել է Իրակլի Կոբախիձեն։

Այսպես կոչված «օտարերկրյա գործակալների» մասին օրենքի վրա դրված նախագահի վետոն հաղթահարելուց հետո՝ հարձակման են ենթարկվել ռուսական օրենքի բազմաթիվ հակառակորդներ։

• Զուկա Բերձենիշվիլին հունիսի 11-ին Թբիլիսիում իր տան մոտ հարձակման է ենթարկվել երեք անձի կողմից։ Ակտիվիստը հարվածներ է ստացել դեմքին, ինչի հետևաքով վիրահատություն է տարվել։ Հարձակումից մեկ ժամ առաջ խորհրդարանի նախագահ Շալվա Պապուաշվիլին սոցցանցում հրապարակել է գրառում, որտեղ Զուկա Բերձենիշվիլիին անվանել է «վրդովված քաղաքացիներից», ով մասնակցում է «կազմակերպված և քաղաքական դրդապատճառներով ահաբեկչության» իշխող կուսակցության անդամների դեմ։ 
• Հունիսի 7-ին Թբիլիսիի պետական ​​համալսարանի առաջին մասնաշենքի մոտ հարձակման է ենթարկվել ակտիվիստ Նիկո Մանագաձեն՝ «Հանուն ազատության» ուսանողական շարժման հիմնադիրը։ Նա այն ուսանողներից է, ով ամեն շաբաթ օրը համալսարանի մոտ դիմավորում է վարչապետ Իրակլի Կոբախիձեին ու բողոքում ռուսական օրենքի դեմ։

Քաղաքացիական ակտիվիստների նկատմամբ բռնության ոչ մի փաստ չի հետաքննվել։