Լրահոս

«Եվս մեկ անգամ ուզում եմ ընդգծել, որ մենք շատ ուշադիր հետևելու ենք ոչ միայն բուն ընտրություններին, ընտրությունների օրվան, այլև ողջ ընտրարշավին։ Մենք անկեղծորեն հույս ունենք, որ կլինի հավասար ընտրական միջավայր, և բոլոր քաղաքական կուսակցությունները կունենան բավարար տարածք իրենց ծրագրերը ներկայացնելու համար, և առաջին հերթին բռնություն չի լինի, քանի որ բռնությունը բացարձակապես անընդունելի է ցանկացած ժողովրդավարական երկրում»,- լրագրողներին ասել է դեսպանը։

Պավել Հերչինսկին նշել է, որ ազատ և արդար ընտրությունները Եվրահանձնաժողովի կողմից հաստատված և ԵՄ անդամ երկրների կողմից սատարվող 9 քայլերից մեկն է։ Դեսպանի խոսքով՝ սա շատ կարևոր տարր է, որը կդիտարկվի մեծ ուշադրությամբ։

«Վրաստանի կառավարությունն արդեն պարտավորվել է ԵԱՀԿ/ԺՀՄԻԳ-ից երկարաժամկետ մոնիտորինգ խնդրել, և ես գիտեմ, որ ԵՄ անդամ բոլոր երկրներն աջակցում են դրան։ ԵԱՀԿ անդամ երկրների դեպքում ԵԱՀԿ-ն պատասխանատու է երկարաժամկետ դիտարկման համար, բայց ԵՄ անդամ երկրների միջև քննարկվում է, թե ինչպես կարող է ԵՄ-ն մասնակցել նաև ընտրությունների երկարաժամկետ դիտարկմանը»,- ասել է Հերչինսկին։

2023 թվականի դեկտեմբերի 14-ին Եվրոպական խորհուրդը Վրաստանին շնորհեց ԵՄ անդամակցության թեկնածուի կարգավիճակ՝ պայմանով, որ երկրի կառավարությունը քայլեր կձեռնարկի 9 ուղղություններով։ Ազատ, արդար և մրցակցային ընտրական գործընթացի ապահովումը հատկապես 2024 թվականին՝ 9 պայմաններից մեկն է։ Պայմանների կատարումն անհրաժեշտ է անդամակցության բանակցություններ սկսելու փուլին անցնելու համար։