Մենք կշարունակենք աջակցել վրացական այն կազմակերպություններին, որոնք օգնում են ժողովրդին․ ԱՄՆ դեսպանություն

«Մեր նախագծերից մեկի դեմ ուղղված մեղադրանքները կեղծ են և հիմնովին խեղաթյուրում են Վրաստանին մեր օգնության նպատակները։

USAID-ն աջակցում է Վրաստանի բնակչությանը 1992 թվականից։ Ինչպես միշտ, այս աջակցությունը թափանցիկ է, և մենք ողջունում ենք ցանկացած հնարավորություն քննարկելու կառավարության ցանկացած մտահոգություն:

Քաղաքացիների՝ իրենց կարծիքն ու ձգտումներն ազատորեն արտահայտելու իրավունքը ցանկացած ժողովրդավարության հիմքն է և արժեք, որը կիսում ենք մենք՝ երկու երկրներս»,- ասված է դեսպանության հաղորդագրության մեջ։

Դեսպանությունը հաստատում է, որ USAID-ի Քաղաքացիական հասարակության ներգրավման ծրագիրը ավելի քան երկու տարի աշխատում է CANVAS-ի հետ՝ օգնելու մարդկանց բարձրացնել իրենց ձայնը իրենց ընտանիքների և համայնքների համար կարևոր խնդիրների վերաբերյալ:

«CANVAS-ի հետ համագործակցությամբ դասընթացներ են անցկացվել մանկական ուռուցքային հիվանդությունների բուժման բարելավում պահանջող մայրերի և տարեց քաղաքացիների իրավունքների պաշտպանությամբ զբաղվող անձանց համար»,- նշվում է հաղորդագրության մեջ։

Հոկտեմբերի 2-ին Պետական ​​անվտանգության ծառայությունում կայացած ճեպազրույցում ՊԱԾ-ի ներկայացուցիչ Խվիչա Բեգիաշվիլին ասել է, որ հասարակական կազմակերպությունների և քաղաքացիական ակտիվիստների խոշոր խմբերից մեկը, որը պետք է վճռորոշ դեր ունենա կառավարության բռնի տապալման գործընթացի նախապատրաստման և իրականացման գործում, վերապատրաստվել է USAID-ի ֆինանսավորմամբ։ Դրանից հետո Վրաստանի խորհրդարանի նախագահ Շալվա Պապուաշվիլին USAID-ին մեղադրեց անկարգություններ ներշնչելու ֆինանսավորման մեջ։

Վարչապետ Իրակլի Ղարիբաշվիլիի խոսքով՝ Անվտանգության ծառայության հայտարարությունները կանխարգելիչ բնույթ են կրում, և նա սպասում է «թափանցիկ բացատրության» USAID-ի տեղական գրասենյակից։

Քաղաքացիական հասարակության ներգրավման ծրագիրը հնգամյա նախաձեռնություն է, որը ֆինանսավորվում է USAID-ի կողմից և իրականացնում է Արևելք-Արևմուտք կառավարման ինստիտուտը (EWMI): 15 միլիոն ԱՄՆ դոլար բյուջեով ծրագիրը մեկնարկել է 2021 թվականի նոյեմբերին և կավարտվի 2026 թվականի հոկտեմբերի 31-ին։ Ծրագրի նպատակն է ամրապնդել Վրաստանի քաղաքացիական հասարակությունը, օգնել նոր և գործող քաղաքացիական դերակատարներին զարգացնել իրենց կարողությունները, բարձրացնել իրենց լեգիտիմությունն ու վստահությունը, որպեսզի նրանք կարողանան արդյունավետ կերպով ներկայացնել քաղաքացիների շահերը:

Արևելք-Արևմուտք կառավարման ինստիտուտի կայքում հրապարակված է, որ տարբեր միջազգային և տեղական կազմակերպություններ, ներառյալ CANVAS-ը (Կիրառական ոչ բռնի գործողությունների և ռազմավարությունների կենտրոն), սերտորեն համագործակցելու են EWMI-ի հետ ծրագրի իրականացման գործընթացում:

ՊԱԾ-ը հենց CANVAS-ի ներկայացուցիչներին է կապում Վրաստանում պետական ​​հեղաշրջման համար խմբերի նախապատրաստման հետ։