Մենք պատրաստվում ենք քննարկել Վրաստանի կառավարության ռեպրեսիաների հետևանքները․ Կալաս

Նիստից առաջ Կալասը լրատվամիջոցներին ասել է, որ Վրաստանում իրադարձությունները ճիշտ ուղղությամբ չեն ընթանում՝ «այնտեղ, որտեղ պետք է լինի թեկնածու երկիրը»։

«Այնպես որ, մենք պատրաստվում ենք քննարկել Վրաստանի կառավարության կողմից ռեպրեսիաների կիրառման հետևանքները և այն բոլոր գործիքները, որոնք նա օգտագործում է ընդդիմության դեմ։ Ի՞նչ կարող ենք անել եվրոպական կողմից՝ մի հարց, իհարկե, պատժամիջոցներն են, մյուս կողմից՝ նաև առանց վիզայի ռեժիմի սահմանափակումը»,- ասել է Կայա Կալասը։

Եվրահանձնաժողովի փոխնախագահը նշել է, որ այս հարցի շուրջ քննարկումն արդեն անցկացվել է, և կա պատժամիջոցների ենթարկելու անձանց ցուցակ, սակայն անհրաժեշտ է, որ 27 ժողովրդավարական երկրները համաձայնության գան։

«Մենք քննարկում ենք այս ցուցակը, բայց պետք է, որ բոլորը համաձայնեն, և մենք դեռ այնտեղ չենք հասել։ Այսպիսով, տեսնենք՝ կհասնենք այնտեղ, թե ոչ»,- ասել է Կայա Կալասը, ով Էստոնիայի նախկին վարչապետն է։ Նրա գլխավորությամբ ԱԳ նախարարների խորհրդի նիստն առաջին անգամ կանցկացվի այսօր։

Հունգարիան մտադիր է վետո դնել Վրաստանի կառավարության ներկայացուցիչների դեմ ԵՄ-ի կողմից սահմանված ցանկացած պատժամիջոցների վրա։

Դեկտեմբերի 2-ին Էստոնիան և Լիտվան վիզային սահմանափակումներ են մտցրել «Վրացական երազանքի» պատվավոր նախագահ Բիձինա Իվանիշվիլիի, ՆԳ նախարար Վախթանգ Գոմելաուրիի և ՆԳՆ 9 այլ բարձրաստիճան պաշտոնյաների համար։ Դեկտեմբերի 15-ին երկրներն ընդլայնել են պատժամիջոցների ենթարկված անձանց ցուցակը․ Էստոնիան արգելել է Վրաստանի ևս 14 բարձրաստիճան պաշտոնյաների մուտքը իր տարածք, իսկ Լիտվան՝ 17 պաշտոնյայի։ Նրանց թվում է Իրակլի Կոբախիձեն։