Մենք պատժամիջոցներ կկիրառենք Վրաստանի առանցքային անձանց նկատմամբ․ Կանադայի արտաքին գործերի նախարար

Մելանի Ջոլիի խոսքով՝ Կանադան համերաշխ է վրաց ժողովրդի հետ և շատ մտահոգված է, թե ինչ է փորձում անել Ռուսաստանը Վրաստանում։

«Այնպես որ, մենք կհետևենք օրինակին, կպատժենք առանցքային անձանց, ինչպես նաև ձեռնարկություններին, կազմակերպություններին, որոնք ներգրավված են մարդու իրավունքների խախտումների կամ կոռուպցիայի մեջ՝ հիմնվելով մեր պատժամիջոցների ռեժիմի վրա: Այնպես որ, մոտ օրերս ինձանից ավելի շատ կլսեք այս հարցի մասին»,- ասել է դիվանագետը։

Այսօր Բալթյան երկրները՝ Լիտվան, Լատվիան և Էստոնիան վիզային սահմանափակումներ են մտցրել «Վրացական երազանքի» պատվավոր նախագահ Բիձինա Իվանիշվիլիի և ՆԳՆ 10 բարձրաստիճան պաշտոնյաների նկատմամբ։ Ըստ Էստոնիայի արտաքին գործերի նախարար Մարգուս Ցահկնայի, նրանց արգելվել է մուտքը նշված երկրներ՝ Վրաստանում օրինական բողոքի ցույցերի ագրեսիվ ճնշմամբ մարդու իրավունքների լուրջ խախտումներին մասնակցելու պատճառով։

Լատվիայի արտաքին գործերի նախարար Բայբա Բրագեն մամուլի ասուլիսում մտահոգություն է հայտնել Վրաստանի կառավարության որոշման առնչությամբ՝ չգնալ եվրաինտեգրման ճանապարհով մինչև 2028 թվականը, չնայած այն բանին, որ Եվրամիությունը մշտապես հայտարարում է, որ դուռը բաց է և Վրաստանի կառավարությանը մնում է համապատասխան բարեփոխումներ իրականացնել, գնալ ժողովրդի աջակցած ճանապարհով։ Միևնույն ժամանակ, Բայբա Բրագեն նշել է, որ Վրաստանում առկա իրավիճակը՝ բողոքի ճնշում, հարյուրավոր մարդկանց ձերբակալություններ և բռնություններ, մի բան է, որի մասին իրենք չեն կարող լռել։ «Ուստի մենք միջոցներ կձեռնարկենք, որոնք կազդեն հանցագործների վրա»,- ասել է Լատվիայի արտգործնախարարը։

Այս թեմայով՝

Կանադան կվերանայի իր հարաբերությունները Վրաստանի կառավարության հետ