Նա կռվել է 2008 թվականի պատերազմում, փնտրում էին ու բռնեցին․ սպանված Թամազ Գինտուրիի եղբայր

Նրա խոսքով՝ Թամազ Գինտուրին կոչումով մայոր է եղել և 2008 թվականին իսկապես մասնակցել է ռուս-վրացական պատերազմին։

«Որքան գիտեմ, փնտրում էին, և բռնեցին։ 9 հոգի են եղել, 9 հոգու դեմ ինչպես կարող էին երկու հոգի գլուխ հանել։ 9 ավտոմատով մարդու վրա ձեռքով չէին կարող հարձակվել»,- ասել է Նիկոլոզ Գինտուրին։

Սպանությունը տեղի է ունեցել նոյեմբերի 6-ին։ Ռուս զինվորականներն առևանգել են նույն գյուղի բնակիչ, 33-ամյա Լևան Դոթիաշվիլին, ով եղել է Թամազ Գինտուրիի հետ։ Դոթիաշվիլին պահվում է Ցխինվալիի մեկուսարանում։

Ըստ Կիրբալի գյուղի բնակիչների՝ ռուս զինվորականները ոչ ոքի թույլ չեն տվել մոտենալ վիրավոր Թամազ Գինտուրիին։ 112-ին մահացածի հեռախոսից զանգահարել են տվել Լևան Դոթիաշվիլիին և դեպքի վայր են կանչել շտապօգնության խումբ, սակայն բժիշկները Թամազ Գինտուրիին գտել են արդեն մահացած։

Երեկ օրվա վերջում Ռուսաստանի կողմից օկուպացված Ցխինվալիի հեռուստատեսությունը տեսանյութ է հրապարակել, որտեղ երևում է, թե ինչպես են Թամազ Գինտուրին ու Լևան Դոթիաշվիլին բացել փակված եկեղեցու դուռը։

Վրաստանի կենտրոնական իշխանությունը դիմել է ռուսական օկուպացիոն ուժերի ներկայացուցիչներին՝ պահանջելով վերադարձնել առևանգված Լևան Դոթիաշվիլիին և պատժել Թամազ Գինտուրիի սպանության մեջ ներգրավվածներին։

Ռուսաստանի կողմից օկուպացված Ցխինվալիի շրջանի այսպես կոչված Անվտանգության ծառայության տվյալներով՝ Գինտուրին ու Դոթիաշվիլին դիմադրել են սահմանապահներին, երբ նրանք փորձել են ձերբակալել նրանց, ինչը վտանգ է ներկայացրել սահմանապահների կյանքին ու առողջությանը։ «Ձերբակալության փորձի ժամանակ նրանք դիմադրություն են ցույց տվել սահմանապահներին, ինչը սպառնում էր սահմանապահների կյանքին ու առողջությանը։ Սահմանախախտները կացին են կիրառել։ Ավելի ուշ նրանք մեքենայով փորձել են հարվածել սահմանապահին, ապա մեկնել Վրաստան։ Այս անօրինական գործողությունները և Հարավային Օսիայի Հանրապետության պետական ​​սահմանի ապօրինի հատումը կանխելու համար սահմանապահները նախազգուշական կրակոց են արձակել օդ և այն բանից հետո, երբ խախտողները չեն ենթարկվել օրինական պահանջներին, կրակ են բացել նրանց ավտոմեքենայի անվադողերի ուղղությամբ։ Այսպես կոչված «սահմանը» խախտողներից մեկը ծանր վիրավորվել է և շտապ բուժօգնության համար տեղափոխվել վրացական կողմ, իսկ մյուսը ձերբակալվել է»,- ասվում է հայտարարության մեջ։

Վրաստանի նախագահ Սալոմե Զուրաբիշվիլին ժամանել է Կիրբալի գյուղ և իր ցավակցությունն է հայտնել սպանվածի ընտանիքին։ Նախագահը չի մեկնաբանել այցը, թեև նախօրեին ասել էր, որ «վրացական պետականության վրա այս դաժան հարձակումը ևս մեկ անգամ բացահայտում է «միադավան եղբոր» իրական դեմքը»։ «Նոյեմբերի 8-ին կլինի Եվրահանձնաժողովի եզրակացությունը, որը դեռ որոշում չէ, բայց կարևոր է։ Ժամը 8-ին մեծ միջոցառում ու մեծ համերգ էինք ունենալու։ Քանի որ Ռուսաստանը կրկին փորձեց փոխել մեր օրակարգը, և մենք այսօր իսկապես հավատում ենք, որ ոչ մի համերգ հնարավոր չէ, մենք փոխեցինք միջոցառման տեսքը, բայց ոչ դրա էությունը։ Կհավաքվենք, հերթական անգամ կասենք, որ մեր ապագան Ռուսաստանում չէ։ Մենք մեծ ուղերձ կունենանք դեպի Եվրոպա»,- ասել է Սալոմե Զուրաբիշվիլին։

Խորհրդարանի առաջին փոխխոսնակ, «Վրացական երազանքի» անդամ Գիա Վոլսկին պատասխանել է նախագահի հայտարարությանը։ Նրա խոսքով՝ Վրաստանն արժանի չէ «մարդու մահով ուրախացած» քաղաքական գործիչների խմբին, այդ թվում՝ Սալոմե Զուրաբիշվիլիին։

«Ինչ Սաակաշվիլին, ինչ Լևան Խաբեիշվիլին և ինչ Սալոմե Զուրաբիշվիլին։ Իհարկե, մարդիկ նույնպես պետք է դուրս գան, ակցիա անեն, իրենց դիրքորոշումը հայտնեն, բայց մի խումբ քաղաքական գործիչներ, որոնք այդքան ուրախ են մարդու մահով, և նրանց թվում՝ Սալոմե Զուրաբիշվիլին, մեր երկրին հարիր չեն»,- ասել է Վոլսկին։