Նախագահը խորհրդարանին կոչ է արել արտահերթ նիստում քննարկել նաև Ազգային բանկի անդամի թեկնածությունը

Նախագահը մայիսի 24-ին խորհրդարանին է ներկայացրել Էկատերինե Ղազաձեի թեկնածությունը։ Մինչ այդ հատուկ ստեղծված հանձնաժողովը 5 թեկնածուի է առաջարկել, որոնց Սալոմե Զուրաբիշվիլին առանձին է հանդիպել ու զրուցել։

«Վրաստանի նախագահն իր լիազորությունների շրջանակում սահուն և թափանցիկ անցկացրեց ՎԱԲ-ի խորհրդի անդամության թեկնածուների ընտրության գործընթացը և 2024 թվականի մայիսի 24-ին Վրաստանի խորհրդարանին ներկայացրեց անկախ հանձնաժողովի կողմից ընտրված բարձր որակավորում ունեցող թեկնածուին, թեև մինչ այժմ ներկայացված թեկնածության քննարկումը խորհրդարանում ոչ մի մակարդակով չի սկսվել»,- այսօր հայտարարել են նախագահի աշխատակազմից։

Վրաստանի Ազգային բանկի խորհրդում 4 անդամների պաշտոնները թափուր են։ Ինչպես հայտարարել է խորհրդարանի նախագահ Շալվա Պապուաշվիլին, հարցը կքննարկվի, եթե նախագահը խորհրդարանին ներկայացնի բոլոր թեկնածուներին։

«Ներկայացրեք բոլոր թեկնածությունները, և մենք կդիտարկենք դրանք։ Մի քիչ զարմանալի է, երբ կա 4 թափուր աշխատատեղ, ընտրվել է 5 պոտենցիալ թեկնածու և ինչ-ինչ պատճառներով ներկայացվում է միայն մեկը»,- ​​ասել է Պապուաշվիլին։

Խորհրդարանի արտահերթ նիստը տեղի կունենա հուլիսի 18-19-ը։ Հինգշաբթի օրը՝ հուլիսի 18-ին, իրավական հարցերի հանձնաժողովը կլսի գլխավոր դատախազի թեկնածու Գիորգի Գաբիտաշվիլիին։ Նույն օրը լիագումար նիստում քվեարկության կդրվի Գիորգի Գաբիտաշվիլիի թեկնածությունը, իսկ ուրբաթ՝ հուլիսի 19-ին, լիագումար նիստում նախատեսվում է «Համաներման մասին» օրենքի նախագծի առաջին ընթերցմամբ ընդունումը։

Հուլիսի 15-ին Շալվա Պապուաշվիլին դիմել է Վրաստանի նախագահին՝ արտահերթ նիստ նշանակելու խնդրանքով։