საქართველოს პრეზიდენტმა 18 ივლისს პარლამენტის რიგგარეშე სესიის მოწვევის შესახებ განკარგულება გამოსცა. სალომე ზურაბიშვილი საკანონმდებლო ორგანოს მოუწოდებს, დღის წესრიგით გათვალისწინებულ სავარაუდო საკითხებთან ერთად განიხილოს და კენჭი უყაროს მის მიერ წარდგენილ ეროვნული ბანკის საბჭოს წევრის კანდიდატურას, „რათა მეტად აღარ შეფერხდეს და გაჭიანურდეს ეროვნული ბანკის საბჭოს დაკომპლექტების პროცესი“.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
პრეზიდენტმა პარლამენტს ასარჩევად ეკატერინე ღაზაძის კანდიდატურა მაისის ბოლოს წარუდგინა. მანამდე, სპეციალურად შექმნილმა კომისიამ 5 კანდიდატურას გაუწია რეკომენდაცია, რომლებსაც სალომე ზურაბიშვილი ინდივიდუალურად შეხვდა და გაესაუბრა.
„საქართველოს პრეზიდენტმა თავისი უფლებამოსილების ფარგლებში, სებ-ის საბჭოს წევრობის კანდიდატურების შერჩევის პროცესი წარმართა შეუფერხებლად და გამჭვირვალედ და 2024 წლის 24 მაისს საქართველოს პარლამენტს წარუდგინა დამოუკიდებელი კომისიის მიერ შერჩეული მაღალი კვალიფიკაციის მქონე კანდიდატი, თუმცა ამ დრომდე პარლამენტში არცერთ დონეზე არ დაწყებულა წარდგენილი კანდიდატურის განხილვა“, - განაცხადეს დღეს პრეზიდენტის ადმინისტრაციაში.
საქართველოს ეროვნული ბანკის საბჭოში 4 წევრის თანამდებობაა ვაკანტური. როგორც პარლამენტის თავმჯდომარემ, შალვა პაპუაშვილმა თქვა, საკითხს იმ შემთხვევაში განიხილავენ, თუ პრეზიდენტი პარლამენტს ყველა კანდიდატურას წარუდგენს.
„წარმოადგინოს ყველა კანდიდატურა და განვიხილავთ. ცოტა გასაკვირია, როდესაც 4 ვაკანსიაა, 5 სავარაუდო კანდიდატი იყო შერჩეული და რატომღაც მხოლოდ ერთი არის წარმოდგენილი“, - აღნიშნა პაპუაშვილმა.
პარლამენტის რიგგარეშე სესია 18-19 ივლისს გაიმართება. ხუთშაბათს, 18 ივლისს, იურიდიულ საკითხთა კომიტეტი გენერალური პროკურორობის კანდიდატს, გიორგი გაბიტაშვილს მოუსმენს. იმავე დღეს, გიორგი გაბიტაშვილის კანდიდატურას პლენარულ სხდომაზე ეყრება კენჭი, ხოლო პარასკევს, 19 ივლისის პლენარულ სხდომაზე, „ამნისტიის შესახებ“ კანონპროექტის პირველი მოსმენით მიღებაა დაგეგმილი.
რიგგარეშე სესიის დანიშვნის მოთხოვნით საქართველოს პრეზიდენტს შალვა პაპუაშვილმა 15 ივლისს მიმართა.
