Լրահոս

«Լազարեն անմեղ է, և տիկին Սալոմեն դա գիտի, նրան տրվել են գործի նյութերը։ Ուստի կարծում եմ, որ նա ներում կստանա»,- ասել է Լազարեի մայրը՝ Թամթա Կալանդաձեն։

Փաստաբան Լիկա Բիթաձեն նշել է, որ եթե նախագահը բացասական որոշում կայացնի, իրենք կդիմեն Մարդու իրավունքների եվրոպական դատարան։

Այսօր՝ ապրիլի 12-ին, Թբիլիսիի քաղաքային դատարանի դատավոր Զվիադ Շարաձեն հրապարակեց ռուսական օրենքի դեմ անցյալ տարվա մարտին տեղի ունեցած ցույցերի մասնակից Լազարե Գրիգորիադիսի գործով դատավճիռը։ Լազարեն մեղավոր է ճանաչվել ոստիկանների առողջությանը վնաս պատճառելու և ՆԳՆ-ին պատկանող ավտոմեքենան հրկիզելու մեջ։ Նա դատապարտվել է 9 տարվա ազատազրկման։

Պաշտպանական կողմը կարծում է, որ դատավճիռն անարդար է և անօրինական, իսկ դատավոր Զվիադ Շարաձեն նշում է, որ պատճառաբանված որոշման մեջ կպարզաբանի, թե ինչ ապացույցների վրա է հիմնվել։

«Ներկայացվել են վկա ոստիկաններ, որը քրեական հետապնդման ավանդական մեթոդ է, և, այսպես կոչված, տեսաապացույցներ, որտեղ ոչ մի տեղ չի երևում, որ Լազարե Գրիգորիադիսը մոլոտովի կոկտեյլ է նետել ոստիկանների վրա։ Դատավճիռը քաղաքական դրդապատճառներ ունի։ Մենք ակնկալում էինք նման որոշում, քանի որ դատարանը անկախ չէ, և գործադիր իշխանության շահերը հաճախ տեղափոխվում են նաև այլ գործեր»,- ասել է «Մարդու իրավունքների կենտրոնի» գործադիր տնօրեն Ալեկո Ցկիտիշվիլին։

21-ամյա Լազարե Գրիգորիադիսը ձերբակալվել է 2023 թվականի մարտի 29-ին։ Թբիլիսիի քաղաքային դատարանի ցմահ դատավոր Զվիադ Շարաձեն գործը քննում էր ավելի քան մեկ տարի։ Լազարեն իրեն մեղավոր չի համարում։

Մարտի ցույցերից մեկ տարի անց «Վրացական երազանքը» կրկին ներկայացրեց այսպես կոչված «օտարերկրյա գործակալների» մասին օրենքի նախագիծը, որը մերժվեց լայնածավալ բողոքի ակցիաների ու միջազգային ճնշումների արդյունքում։ Իշխող կուսակցությունը չկատարեց խոստումը, որ օրինագիծը խորհրդարանից «անվերապահորեն, առանց վերապահումների» հետ կկանչվի։ Օրենքի նախագծի տեքստը նույն է՝ միայն «օտարերկրյա ազդեցության գործակալ»-ը փոխարինվել է «օտար ուժի շահերը կրող կազմակերպություն» եզրույթով։