Երդվյալ ատենակալները մեղադրյալ Ալի Բալաձեին և Մամուկա Բերիձեին մեղադրական դատավճիռ են կայացրել սերժանտ Ռոին Շավաձեի սպանության գործով։ Աջարիայի սահմանադրական անվտանգության վարչության (ՍԱՎ) նախկին փոխղեկավար Ալի Բալաձեն մեղավոր է ճանաչվել Ռոին Շավաձեի անօրինական ձերբակալության և սպանության կազմակերպման մեջ, իսկ հատուկ նշանակության ջոկատի նախկին սպա Մամուկա Բերիձեն՝ անօրինական ձերբակալության և խմբակային սպանության մեջ։ Երկուսն էլ դատապարտվել են 12 տարվա ազատազրկման։
Լրահոս
Ընթերցողի ընտրանի
- 1 Ես կտրականապես դեմ էի առանց վիզայի ռեժիմի կասեցմանը, բայց փոխեցի իմ դիրքորոշումը․ Ռոթ
- 2 Նախագահը չի ճանաչում ընտրությունների արդյունքները. հոկտեմբերի 28-ին Ռուսթավելիում հավաք է նախատեսվում
- 3 Գախարիայի կուսակցությունից հայտնել են, որ ԿԸՀ-ում առկա ընտրակեղծիքների ապացույցները վտանգի տակ են
- 4 Եվրահանձնաժողովի գնահատմամբ՝ Վրաստանը չի կատարել անցյալ տարվա հանձնարարականները
- 5 Բայդենի հայտարարությունից պարզ է դառնում, որ այս ընտրությունները չեն կարող լեգիտիմ ճանաչվել․ «Ուժեղ Վրաստան»
- 6 Եվրահանձնաժողովը խորհուրդ չի տալիս սկսել Վրաստանի անդամակցության շուրջ բանակցությունները
Թբիլիսիի քաղաքային դատարանում որոշման հրապարակմանը հաջորդել է դատապարտյալների ընտանիքի անդամների բողոքն ու աղմուկը, ինչի պատճառով նրանք հեռացվել են դատարանի դահլիճից։ Ալի Բալաձեի և Մամուկա Բերիձեի ամուսինները պնդում են, որ իշխանությունները պաշտպանում են իրական հանցագործներին, քանի որ նրանք դեռ աշխատում են բարձր պաշտոններում։
Սերժանտ Ռոին Շավաձեն սպանվել է օգոստոսի 16-ին՝ 2008 թվականի ռուս-վրացական պատերազմից մի քանի օր անց։ Մեղադրող կողմի վարկածով, ՍԱՎ-ի հատուկ նշանակության ջոկատի աշխատակիցները գլխավոր բաժնի պետի գլխավորությամբ Բաթումիում նախ ձերբակալել են Շավաձեին ու դաժան ծեծի ենթարկել, ապա տարել Քոբուլեթիի և Գուրիայի սահման և սպանել նրան կալաշնիկով համակարգի ավտոմատների բազմաթիվ կրակոցներով։
Դատաբժշկական փորձաքննության եզրակացության համաձայն՝ Ռոին Շավաձեն մարմնին ունեցել է մոտ 40 հրազենային վնասվածք։ Բացի այդ, մահացածը ունեցել է մարմնական վնասվածքներ, որոնք իրեն հասցվել են մահից առաջ բռնության հետևանքով, այդ թվում՝ ձախ բազուկի, ձախ ազդրի և կողոսկրերի կոտրվածքներ։ Ռոին Շավաձեի մարմնի վրա եղել են նաև ջերմային վնասվածքների հետքեր, որոնք պետք է առաջացած լինեն վառված ծխախոտից։ Դատախազության տվյալներով՝ Ռոին Շավաձեի ապօրինի ձերբակալության ու սպանության փաստը քողարկելու նպատակով ՍԱՎ-ի աշխատակիցները կեղծել են գործը։
2020 թվականի նոյեմբերին Մարդու իրավունքների եվրոպական դատարանը «Շավաձեն ընդդեմ Վրաստանի» գործով հայտնաբերել է վրացական պետության կողմից կյանքի իրավունքի խախտում։ Դատարանի գնահատմամբ՝ գործող իշխանության պնդումը, թե Շավաձեի մահը բռնության ժամանակ ուժի կիրառման հետևանք է, որը անհրաժեշտ էր նրա փախուստը կանխելու համար, չի համապատասխանում գործում առկա ապացույցներին։ Ստրասբուրգի դատարանը Վրաստանին պարտավորեցրել է արդյունավետ հետաքննություն անցկացնել։ Որոշման կատարմանն ու հետաքննության ընթացքին վերահսկել է Եվրոպայի խորհրդի Նախարարների կոմիտեն։
Հանցագործությունից 15 տարի անց քրեական հետապնդում է հարուցվել ընդհանուր առմամբ 12 անձի նկատմամբ։ 2023 թվականի հուլիսին Ռոին Շավաձեի ապօրինի ձերբակալության, դիտավորությամբ սպանության և պաշտոնեական լիազորությունները գերազանցելու մեղադրանքով ձերբակալվել է 8 մարդ, հետախուզում է հայտարարվել Աջարիայի ոստիկանության ներկայիս պետ Թեյմուրազ Պատարիձեի և հատուկ ջոկատայիններից Գիորգի Արաբուլիի նկատմամբ։ 2024 թվականի փետրվարին դատախազությունը ձերբակալել էր ևս երկու հոգու։ Նրանց նկատմամբ որպես խափանման միջոց է ընտրվել կալանքը։
