Շանտաժի ետևում ոչ թե ԱՄՆ-ն է կամ ԵՄ-ն, այլ գլոբալ պատերազմի կուսակցությունը․ Իվանիշվիլին՝ ԱՄՆ դեսպանությանը

«Երբ խոսում էինք բանկային հաշիվների կողոպուտի և ֆինանսական շանտաժի մասին, մենք միշտ նշում էինք, որ այդ շանտաժի ետևում կանգնած են ոչ թե ԱՄՆ-ը կամ Եվրամիությունը, այլ այն ուժերը, որոնց մենք անվանում ենք գլոբալ պատերազմի կուսակցություն։ Մենք ԱՄՆ-ին կամ Եվրամիությանը չմեղադրեցինք ֆինանսական շանտաժի մեջ նույնիսկ այն ժամանակ, երբ Credit Suisse-ն օգտագործեց Եվրախորհրդարանի ընդունած բանաձևը որպես գումարը չփոխանցելու հերթական պատրվակ։ Ավելին, մենք մեկ անգամ չէ, որ պարզաբանել ենք, որ գլոբալ պատերազմի կուսակցություն ասելով նկատի չունենք ոչ ԱՄՆ-ն, ոչ Եվրամիությունը, սակայն միևնույն ժամանակ նշել ենք, որ գլոբալ պատերազմի կուսակցությունը սկզբունքային ազդեցություն ունի բյուրոկրատների վրա ինչպես ԱՄՆ-ում, այնպես էլ Եվրամիությունում։

Սա է հիմնական պատճառը, որ մինչև ֆինանսական շանտաժի ավարտը ես հրաժարվում եմ հանդիպել ամերիկացի քաղաքական գործիչների և բյուրոկրատների հետ, քանի որ նրանցից յուրաքանչյուրի նկատմամբ գլոբալ պատերազմի կուսակցության ազդեցության հավանականությունը շատ մեծ է»,- ասում է Բիձինա Իվանիշվիլին։

Բացի այդ, ըստ Իվանիշվիլիի, իր փաստաբանները բազմիցս մանրամասն տեղեկություններ են հայտնել Ուկրաինայում սկսված պատերազմից հետո իր նկատմամբ կիրառված ֆինանսական սահմանափակումների մասին։

Հենց գլոբալ պատերազմի կուսկացությունն է այն ուժը, որը փորձում է ծածկել ԱՄՆ-ին և Եվրամիությանը` գործելով Վրաստանի ազգային շահերի դեմ և իրադարձությունները ներկայացնելով այնպես, թե իբր Վրաստանը կոնֆլիկտ ունի ոչ թե իր, այլ ԱՄՆ-ի և Եվրամիության հետ»,- ասում է Իվանիշվիլին։

Իշխող կուսակցության ղեկավարը հավելում է, որ «այս ֆոնին «Վրացական երազանքն» այն քաղաքական ուժն է, որն ամեն ինչ անում է վրացական հասարակության աչքում ԱՄՆ-ի և Եվրամիության հեղինակությունը չվնասելու և իրադարձություններին իրենց անունը տալու համար»։

«Եթե վրաց հասարակությունը հավատա, որ Վրաստանում ժողովրդի կամքին հակառակ իշխանությունը փոխել և հավաքական «Ազգային շարժմանը» իշխանության վերադարձնել ցանկանում է ոչ թե գլոբալ պատերազմի կուսակցությանը, այլ ԱՄՆ-ը և ԵՄ-ը, ապա սա անուղղելի վնաս կհասցնի թե՛ ԱՄՆ-ի, թե՛ ԵՄ-ի իմիջին։

[...] Նաև վրաց հասարակությունը կարող է մտածել, որ 2022 թվականին արմատական ​​ընդդիմությունը, հասարակական կազմակերպությունները և Ուկրաինայի կառավարության բարձրաստիճան պաշտոնյաները կոչ էին անում մեզ երկրորդ ճակատ բացել ոչ թե գլոբալ պատերազմի կուսակցության, այլ ԱՄՆ-ի և ԵՄ-ի ցուցումներով։

Նմանապես, վրաց հասարակությունը կարող է նաև մտածել, որ 2020-22 թվականներին ոչ թե գլոբալ պատերազմի կուսակցությունը, այլ ԱՄՆ-ն ու Եվրամիությունը փորձեցին երկու անգամ խաթարել երկիրը։

Մենք չենք ուզում թույլ տալ, որ հասարակական կարծիքը զարգանա այս ուղղությամբ և ամեն ինչ անելու ենք դրա դեմ։ Սակայն այս հարցում մեզ անհրաժեշտ կլինի ամերիկյան կողմի օգնությունը։ Եվ դրա համար ամենակարևորը վրացիներին պատմելն է ոչ թե «այլ պատմություն», այլ իրական պատմություն», - ասվում է Բիձինա Իվանիշվիլիի հայտարարության մեջ։

Վրաստանում Ամերիկայի Միացյալ Նահանգների դեսպանությունն այսօր հայտարարել է, որ Բիձինա Իվանիշվիլին գիտի, որ Credit Suisse-ի հետ կապված գումարները գտնվում են Բերմուդների և Սինգապուրի դատարանների ձեռքում, այլ ոչ թե ամերիկյան դատարանների, սակայն նա Վրաստանի ժողովրդին իրականությունը ներկայացնում է այլ կերպ. «Ինչո՞ւ է նա վրացիներին այլ պատմություն պատմում»,- կարդում ենք դեսպանության ֆեյսբուքյան էջում հրապարակված պաստառի վրա, որտեղ քարտեզի վրա նշված են Սինգապուրն ու Բերմուդները։

Այս թեմայով՝

«Գողի գլխին գլխարկն այրվում է»․ Ծիլոսանին՝ ԱՄՆ դեսպանության հայտարարության մասին