«Վրացական երազանքը» խորհրդարանի առաջին նիստին դեսպաններին չի հրավիրել

«Խորհրդարանի առաջին նիստին հրավիրված են կառավարության անդամներն ու սահմանադրական մարմնի ներկայացուցիչները։ Ինչ վերաբերում է դեսպաններին, ապա նրանք առաջին նիստին հրավիրված չեն։

Սա մեր ներքաղաքական խնդիրն է, ինչ վերաբերում է ընտրություններին և խորհրդարանի առաջին նիստին, և այդ թվում, օտարերկրացիների սխալ ազդեցությունը նվազագույնի հասցնելու համար կարևոր է, որ այդ գործընթացում դեսպանների կամ այլ երկրների ներգրավումը պարտադիր չլինի։

Մենք՝ վրացիներս, պետք է գիտակցենք, որ սա վրացական, Վրաստանի խորհրդարանն է, որում ներկայացված են լինելու կառավարությունն ու սահմանադրական մարմինները՝ խորհրդարանի նորընտիր անդամների հետ միասին։ ...Սա ընդհանուր մոտեցում է, որը, կարծում եմ, կարևոր է խորհրդարանի համար»,- ասել է Պապուաշվիլին։

Նրա խոսքով, խորհրդարանի առաջին նիստը կսկսվի ժամը 12:00-ին, այն կնախագահի ավագ անդամ Լադո Կախաձեն:

Երեկ՝ նոյեմբերի 21-ին, «Հանուն Վրաստանի» կուսակցության նախագահ, Վրաստանի նախկին վարչապետ Գիորգի Գախարիան դիմել էր Վրաստանում հավատարմագրված դեսպաններին՝ խնդրելով նրանց չմասնակցել նորընտիր խորհրդարանի առաջին նիստին և այդպիսով «Վրացական երազանքին» չտալ լեգիտիմություն ձեռք բերելու հնարավորություն։

Սահմանադրության համաձայն՝ առաջին նիստը նշանակում է նախագահը, թեև Սալոմե Զուրաբիշվլին կարծում է, որ խորհրդարանը ոչ լեգիտիմ է և համապատասխան հրամանագիր չի հրապարակել։ Զուրաբիշվիլին դիմել է Սահմանադրական դատարան՝ ընտրությունների արդյունքները հակասահմանադրական ճանաչելու պահանջով։

Առաջին նիստին ընդդիմադիր կուսակցությունների ներկայացուցիչները չեն մասնակցի։ Նրանք պահանջում են միջազգային հետաքննություն անցկացնել հոկտեմբերի 26-ի ընտրությունների վերաբերյալ և նշանակել նոր ընտրություններ։

Կենտրոնական ընտրական հանձնաժողովի տվյալներով, որը ճանաչում է միայն իշխող կուսակցությունը, նոր խորհրդարանում 150 մանդատներից ընդդիմությունը ստացել է 61-ը, իսկ մնացած 89 մանդատները պատկանում են «Վրացական երազանքին»։

2020 թվականին 10-րդ գումարման խորհրդարանի առաջին նիստին մասնակցել են Վրաստանի նախագահը, գործադիր և դատական ​​իշխանությունների, դիվանագիտական ​​կորպուսի և Վրաստանի պատրիարքարանի ներկայացուցիչներ։ Այն անցկացվել է ընդդիմության բոյկոտի ֆոնին։