Վրաստան կատարած այցի ժամանակ Օրբանը չի ներկայացնում Եվրամիությունը. Բորել

«Հունգարիայի վարչապետ պարոն Օրբանը չի ներկայացնում Եվրամիությունը Վրաստան կատարած այցի ժամանակ»,- ասել է Բորելը իսպանական ռադիոյին տված հարցազրույցում՝ նշելով, որ նա՝ որպես Եվրոպական միության խորհրդի ռոտացիայի կարգով ընտրված նախագահ, լիազորություններ չունի արտաքին քաղաքականության մեջ։

Այսօր՝ հոկտեմբերի 28-ին, կառավարության պատվիրակության հետ Վրաստան կայցելի Հունգարիայի վարչապետը։

Վիկտոր Օրբանը ԵՄ անդամ երկրի միակ ղեկավարն է, ով շնորհավորել է «Վրացական երազանքին» խորհրդարանական ընտրություններում տարած հաղթանակի կապակցությամբ։ Հոկտեմբերի 26-ին, դեռևս ԿԸՀ-ի նախնական արդյունքների հրապարակումից առաջ, X հարթակում նա գրել էր. «Շնորհավորում եմ վարչապետ Կոբախիձեին և «Վրացական երազանքին» խորհրդարանական ընտրություններում տարած հաղթանակի կապակցությամբ։ Վրաստանում մարդիկ գիտեն, թե ինչն է լավագույնն իրենց երկրի համար, և այսօր նրանց ձայնը լսվեց»:

Միաժամանակ Եվրամիության մի քանի երկրների արտաքին գործերի նախարարներ, ինչպես նաև Միացյալ Թագավորության կառավարության ներկայացուցիչը կոչ են անում Վրաստանի իշխանություններին հետաքննել ընտրությունների ընթացքում հայտնաբերված խախտումները։

«Կոչ ենք անում Կենտրոնական ընտրական հանձնաժողովին և այլ պատկան մարմիններին կատարել իրենց պարտականությունը՝ արագ, թափանցիկ և անկախ հետաքննելու և ընտրախախտումների ու մեղադրանքների քննարկման համար։ Այդ խախտումները պետք է հստակեցվեն ու վերացվեն։ Սա անհրաժեշտ քայլ է ընտրական գործընթացի նկատմամբ վստահությունը վերականգնելու համար»,- ասվում է Ժոզեֆ Բորելի եւ Եվրահանձնաժողովի համատեղ հայտարարության մեջ։

ԿԸՀ տվյալներով՝ «Վրացական երազանքը» ընտրություններում ստացել է ձայների 53,92 տոկոսը։ Արդյունքների լեգիտիմությունը չեն ճանաչում ընդդիմադիր կուսակցությունները և երկրի նախագահը։ Սալոմե Զուրաբիշվիլիի խոսքով՝ ընտրություններն ամբողջությամբ կեղծվել են, և անցկացվել է «ռուսական հատուկ գործողություն»։