Վրաստանի կառավարությունը չի ցանկանում լինել Արևմուտքի խաղաքարը․ Լավրով

«ԱՄՆ-ը և Եվրամիությունը փորձում են Թբիլիսիին կանգնեցնել կեղծ երկընտրանքի առաջ՝ մեզ հետ, թե մեր դեմ։ Միևնույն ժամանակ, Վրաստանի կառավարությունը կարծես ցանկանում է վարել ինքնիշխան քաղաքականություն, որը կպատասխանի ազգային շահերին, այլ ոչ թե արևմտյանների ձեռքում դառնալ խաղաքար, որոնք Վրաստանը մղում են ապակայունացման, տնտեսական խնդիրների և Ռուսաստանի հետ հարաբերությունների սրման։ Ես կասկած չունեմ, որ վրաց ժողովուրդն ամեն ինչ հասկանում է և կշարունակի առաջ շարժվել»,- ասել է Լավրովը ռուսական պետական ​​ТАСС լրատվական գործակալությանը տված հարցազրույցում։

Սերգեյ Լավրովը խոսել է նաև Ռուսաստանի սահմաններին մոտիկ «գունավոր հեղափոխությունների» մասին և ասել, որ Ռուսաստանի ամենամոտ հարևանների գործերին միջամտությունը վաղուց արևմտյան քաղաքական գործիչների «արտաքին քաղաքական զինանոցի մի մասն է»։

Լավրովը նշել է, որ Վրաստանում տեղի ունեցող զարգացումները երկակի ստանդարտների կիրառման արդյունք են, «երբ ժողովրդավարության և մարդու իրավունքների երևակայական մտահոգության պատրվակով ամեն ինչ արվում է ընտրությունների արդյունքները վերախաղարկելու համար, որոնք ճանաչվել են ազատ, նույնիսկ ԵԱՀԿ/ԺՀՄԻԳ-ի նման ոտնահարված հեղինակություն ունեցող կառույցի կողմից»:

«Ինչո՞ւ է անհրաժեշտ նորից խաղարկել։ Միայն այն պատճառով, որ Վաշինգտոնում և Բրյուսելում տիկնիկագործներին դուր չի եկել ժողովրդի ընտրությունը»,- ասել է Սերգեյ Լավրովը։

Միջազգային դիտորդական կազմակերպությունները 2024 թվականի հոկտեմբերի 26-ի խորհրդարանական ընտրությունները չեն գնահատել որպես ազատ և արդար։

ԵԱՀԿ/ԺՀՄԻԳ-ի վերջնական զեկույցում նշվում է, որ ընտրություններն անցկացվել են հիմնարար ազատությունների և քաղաքացիական հասարակության վրա վերջին օրենսդրության ազդեցության, ընտրական գործընթացում ներգրավված ինստիտուտների անկախության սահմանափակման և ընտրողների ճնշման հետ կապված լուրջ մտահոգությունների ֆոնին, որոնք ընտրությունների օրվա հետ մեկտեղ, սպառնալիք են հանդիսացել ընտրողներից ոմանց համար՝ առանց վախի քվեարկել։

Եվրախորհրդի խորհրդարանական վեհաժողովի (ԵԽԽՎ) դիտորդական պատվիրակությունը նշում է, որ լուրջ կասկածներ կան, թե արդյոք ընտրական միջավայրն ապահովել է արդար ընտրությունների համար անհրաժեշտ պայմաններ։ «Մեր բացահայտումները, որոնք հիմնված են նախընտրական քարոզարշավի և ընտրությունների օրվա դիտարկումների վրա, ինչպես նաև տեղական հետընտրական դիտորդների հավաստի և հետևողական զեկույցների վրա, մտահոգություններ են առաջացնում ընտրությունների արդյունքների ճշգրտության վերաբերյալ, մասնավորապես՝ արդյոք ընտրությունների արդյունքներն իսկապես արտացոլում են ընտրազանգվածի կամքը»,- ասված է ԵԽԽՎ զեկույցում։

Ըստ «Միջազգային հանրապետական ​​ինստիտուտի» (IRI) ընտրությունները սկզբունքորեն թերի էին, և միայն նոր ընտրությունները կկարողանան վերականգնել հասարակության վստահությունը կառավարության լեգիտիմության նկատմամբ։