Son səkkiz il ərzində Gürcüstandan təxminən 700 000 avtomobil katalizatoru ixrac edilib. Bu barədə Ekologiya və Kənd Təsərrüfatı Nazirliyinin atmosfer havası şöbəsinin rəhbəri Noe Meqrelişvili məlumat verib.
Əsas xəbərlər
“Təəssüf ki, ixrac olduqca irimiqyaslıdır. Maliyyə Nazirliyinin məlumatına görə, 2015-ci ildən, səhv etmirəmsə, ölkədən 700 000 katalizator ixrac olunub ki, bu da fəlakətli rəqəmdir, əminliklə deyə bilərəm.
Bizim qeydiyyatdan keçmiş avtomobil parkımız təxminən milyon yarımdır, lakin yollarda daha azdır və bir milyona yaxın olduğunu nəzərə alsaq, 700 min katalizatorsuz avtomobilin olması çox acınacaqlı mənzərədir.
Məhz buna görə də, 2020-ci ilin aprelindən qeydiyyatda olan avtomobillərdə texniki baxış zamanı katalizatorun olması tələb olunur, bu da yoxlanılır”, - deyə Noe Meqrelişvili “Mtavari” media mərkəzinə bildirib.
Onun sözlərinə görə, ölkədə belə bir təcrübə var ki, avtomobil sahibləri texniki baxış günü üçün katalizatorları alır və ya icarəyə götürürlər.
“Bunun qarşısını almaq üçün ən böyük şəhərlərdə - havanın çirklənməsi ilə bağlı ən böyük problemimiz olan Tbilisi, Batumi, Kutaisi və Rustavidə yollarda avtomobillərdən xaric olunan tullantılara nəzarət etməyə başlayırıq. Birinci mərhələdə Nazirliyin ekoloji nəzarət şöbəsinin əməkdaşları tərəfindən atmosferə atılan tullantıları əyani şəkildə aşkar edən avtonəqliyyat vasitələri saxlanılacaq, xüsusi avadanlıqla yoxlanılacaq, tələblərə əməl edilmədikdə isə müvafiq sanksiyalar tətbiq ediləcək. Bu, bizə o effekti verəcək ki, bu zərərli praktika mümkün qədər azalsın və avtomobillər yollarda düzgün yanma sistemi ilə bir gün deyil, davamlı hərəkət etsinlər”, - Meqrelişvili bildirib.
Gürcüstandan avtomobil katalizatorlarının ixracı üç il müddətinə qadağan ediləcək. Ətraf Mühitin Mühafizəsi və Kənd Təsərrüfatı Naziri Otar Şamuqianın bildirdiyi kimi,yaxın bir neçə gün ərzində hökumətin müvafiq qərarı imzalanacaq və dərhal qüvvəyə minəcək.
Bundan başqa, 2024-cü il yanvarın 1-dən 2013-cü ildən əvvəl istehsal olunmuş minik avtomobillərinin idxalı qadağan olunacaq, 2025-ci ildən bu qadağa avtobus və yük avtomobillərinə də şamil ediləcək. Hökumət bu qərarlarını nasaz avtomobillərin yaratdığı havanın çirklənməsi problemi ilə izah edir.
