Rusyönümlü “Mühafizəkarlar Hərəkatı” partiyasının lideri İrakli Martinenkoya Tbilisi meriyasının binası qarşısında Aİ bayrağının sökülərək yandırılmasına görə inzibati xəta haqqında protokol tərtib edilib ki, bu da 1000 lari cərimə ilə cəzalandırılır. Eyni partiyanın digər lideri Zurab Maxaradze Aİ bayrağını dəfələrlə yandırmaqda ittiham olunur ki, bu da 2000 lariyə qədər cərimə və ya 15 sutka inzibati həbslə cəzalandırılır.
Əsas xəbərlər
“Alt-İnfo”nun rəhbərləri dekabrın 22-də axşam saatlarında Tbilisi meriyası qarşısında ucaldılmış Avropa İttifaqının bayrağını endirərək yandırıblar. Bunu əks etdirən videogörüntüləri rusyönümlü partiyanın telekanalı yayıb. Videoda bayrağın götürülərək yandırılmasına meriyanın mühafizə xidmətinin reaksiya verdiyi görünmür.
“Biz Tbilisi meriyasının inzibati binasından Avropa İttifaqının bayrağını düşürüb yandırdıq, yəni Laşa Şaruxianın hazırda həbsdə olduğu eyni hərəkəti həyata keçirdik. Onda bizi də tutun. Tələb ondan ibarətdir ki, o, azadlığa buraxılsın, əks halda biz bu kampaniyanı davam etdirəcəyik”, - Zurab Maxaradze bildirib. “Alt-İnfo”nun videomaterialına əsasən, rusyönümlü partiyanın liderləri özləri polislə əlaqə saxlayıb və Aİ bayrağının yandırılması barədə məlumat veriblər.
Patrul polisinin əməkdaşları Martinenko və Maxaradzeni polis bölməsinə aparıblar, lakin onlar tezliklə buraxılıblar. Onlara qarşı tərtib edilmiş cinayət sənədlərinə Tbilisi Şəhər Məhkəməsi baxacaq.
“Alt-İnfo” fəalı Laşa Şaruxia bir neçə gün əvvəl Cinayət Məcəlləsinin 187-ci maddəsinin 2-ci hissəsinə əsasən, yəni yandırma, partlatma və ya digər ümumi təhlükəli üsullarla özgənin əmlakını ziyan vurma və ya məhv etməyə görə saxlanılıb. Onun barəsində həbs qətimkan tədbiri seçilib. Təqsirli bilinərsə, Şaruxianı 3 ildən 6 ilə qədər həbs gözləyir.
Şaruxianın həbsindən sonra “Alt-İnfo” “Aİ bayrağını yandır” kampaniyasına başlayıb. Bundan sonra Gürcü Pravoslav Kilsəsinin keşişlərinin Aİ bayraqlarını necə yandırdığını əks etdirən video və fotoşəkillər yayılıb. Bununla onlar Laşa Şaruxiaya həmrəyliklərini bildiriblər.
Parlamentin müxalifətçi deputatı Tamar Kordzaia-nın sözlərinə görə, rusyönümlü radikallar tərəfindən Aİ bayrağının yandırılması kampaniyası “Gürcü Arzusu” tərəfindən təşviq edilir. Kordzaianın sözlərinə görə, hakim partiya Rusiyaya göstərməyə çalışır ki, Gürcüstanda hamı Avropanı istəmir. “Hakim komanda ikili standartla işləyir və məncə, bu hissə Rusiyaya mesaj göndərməyə xidmət edir və onu göstərir ki, Gürcüstanda hamı Avropanı istəmir”, - Tamar Kordzaia bildirib.
