Kekelidze küçəsində köçürülmə əleyhinə keçirilən aksiyada həbs edilən Qiorqi Xasaia və Akaki Çikobava hələ də istintaq təcridxanasındadırlar. Tbilisi Apellyasiya Məhkəməsi birinci instansiyanın qərarını qüvvədə saxlayıb.
Əsas xəbərlər
“Hər ikisi törətdikləri əməli, yəni vurulan maddi ziyanı etiraf edirlər və bu zərəri ödəməyə hazırdırlar. Bizim tərəfimizdən Milli İcra Hakimiyyəti Bürosu ilə fəal ünsiyyət var idi ki, bu proseslər vaxtında həyata keçirilsin. Bu hallara baxmayaraq, Apellyasiya Məhkəməsi həqiqətən problemli və ədalətsiz olan həbs qərarını qüvvədə saxladı.
Bütün bunlar artıq ona bənzəyir ki, bu tədbirlər, nəinki ədalətin maraqlarına xidmət edir, hətta məhbuslara qarşı sərt cəza əli göstərir”, - məhbusların vəkili Quram İmnadze deyir.
Yanvarın 30-da iş üzrə prokuror Roin Xintibadze bildirib ki, təqsirləndirilən şəxslər törətdikləri cinayəti etiraf edib dəymiş ziyanı ödəyərsə, ittiham tərəfi həbsin daha yüngül qətimkan tədbiri ilə dəyişdirilməsini tələb etməyə hazırdır.
Yanvarın 25-də hakim Davit Kurtanidze Tbilisi Dövlət Universitetinin mühazirəçisi Akaki Çikobava və İliya Dövlət Universitetinin doktorantı Qiorqi Xasaia barəsində həbs qətimkan tədbiri seçib. Onlar qrup halında Milli İcra Hakimiyyəti Bürosuna məxsus avtomobilə qəsdən ziyan vurmaqda ittiham olunurlar ki, bu da 3 ildən 6 ilədək azadlıqdan məhrumetmə ilə cəzalandırılır. Prokurorluğun məlumatına görə, təqsirləndirilən şəxslərin hərəkətləri nəticəsində dövlətə 3380 lari dəyərində ziyan dəyib. Növbəti məhkəmə iclası martın 18-nə təyin edilib.
Yanvarın 23-də polis Xatiaşvili ailəsinin evdən çıxarılmasına qarşı keçirilən aksiyada ümumilikdə 20 nəfəri saxlayıb. Onlardan 18-i inzibati qaydada, xırda xuliqanlıq və polisin qanuni tələbinə tabe olmama ittihamı ilə saxlanılıb. Məhkəmə saxlanılanların bəzilərini qanun pozucuları kimi tanıyıb və 2000-2000 lari məbləğində cərimələyib. Hakim Nino Şçerbakov aksiyanı işıqlandırarkən qanunsuz şəkildə saxlanılan jurnalist Qela Mtivlişvilini də 2000 lari məbləğində cərimələyib. Məhkəmə prosesləri hələ bitməyib.
